S’isch ä Mammutversammlig i der Fäschthallä Willisai gsi, wo vo 647 Personä bsuecht worde-n-isch. Dr ZSJV-Vorstand isch in globo fir 3 Jahr wiedergwehlt worde, und der Jodlersouverän hed zwei Unterverbandsfäscht bewilliged. Midem Patrick Koch, em Sarner Jodlerpresidänt wirkt ä neywä Unterverbandsbrichterstatter. Eb diä ney Jodlerzeytig z’stand chund, wird d’Delegiärtäversammlig vom 9. März in Äschlismatt entscheidä. Der Franz-Markus Stadelmaa isch neys ZSJV-Ehrämitglied worde.
Ganzi Heerscharä vo Jodler, Alphornbläser und Fahneschwinger sind um d’Mittagszeyt Richtig Willisaier Fäschthallä gluffä und hend das Gebey i Beschlag gnu. Genai am Eis hend Alphornkläng dä Tagisruim erfillt und churz druifappä isch «Alpmorge» im Gsamtchor gsungä wordä und de hed der Richard Huwiler zur Begriässig agsetzt. 647 Persone, dervo 460 Stimmberächtigti, sind cho und hend wellä wissä, we d’Finanzä stahnd, was i Sachä neywi Jodlerzeytig laift, wevu das sie choschted und wer sie cha, mues, sett oder wott aboniärä.
Finanziell stahd der ZSJV nid schlächt da, de mä hed ä Reingwinn chennä uisweysä und fir s’laifendi Jahr sellid schwarzi Zahlä uisäluege.
S’Jodlerfäscht Schötz isch bekanntlich, nid nur gesanglich und bsuechermässig ä Hammer gsi. Ai der Rubel isch g’rollt und hed ä sattä Reingwinn abgworfä, wo firä Verband ai ä gressere Brosamä vom Tisch gheyjä wird. Zahlä sind keini präsentiärd wordä, was zruggbleybt sind Erinnerigä anes Fäscht för und mit Frönde.
Dass epper im amtierende ZSJV -Vorstand dr Sässel streytig miächt, macht oder gmacht hätt, hed me im Vornherein scho chennä vergässä, will’s ganz klar isch, dass Urschweyzer Jodlervolch froh isch, dass dä Chrampf epper macht. Mit Akklamation sind diä Fraijä und Mannä bestätiged worde. Ai d’Robert Fellmann hed neyd z’befirchtä gha, diä 6 Mitglieder verbleybid im Stiftigsrat. Nachdem der bishärigi Brichterstatter Joel von Moos zruggträttä isch, hed mä ä Nachfolger gsuecht und dä i der Person vom 37-jährige Patrick Koch, Presidänt vom Jodlerklub Sarnä, gfundä.
Es Fäscht für alli, isch s’Motto vom diesjährige Jodlerfäscht Horw vom 28. -30. Juni Da isch me uf guete Wägä und hofft, dass ä huifä Amäldigä inächemid. S’Fäscht wird mit Klassiärig duregfiährd. De Chargiertä hed me s’Vetruijä uisgsprochä. Und s’Fäschtliäd vom Hans Aregger hed d’Uruiffiährig dur d’Trägerverein Turnerchörli und Heimelig Horw bestens bestandä.
S’Kursprogramm isch erleytered worde und diä nechschti Tagig findet i dr Waldmannhallä z’Baar äbä statt.
31. Eidgenössische Jodlerfest in Baasel 26. - 28. Juni 2020
Jo s’isch wohr, denn imne Johr diä-n d’Jodlerlyt dött zämmästoh und ä Jutz go loh. Ai dettä hofft me ufene grossi Beteiligung, wobey ä Jodlerfäschtteilnahm inzwische je lenger je meh zunere Preysfrag wird. (undr eys gsäid vom Gäld redt mä nid mä hed’s!?)
64. Zentralschweizer Jodlerfäscht 2021 vom 25. - 27. Juni 2021 z’Andermatt
Souverän, gekonnt ja sogar sehr professionell hend diä beedä Uirner Jodlerklib «Bärgbliämli» Schattdorf und «Seerose» Fliälä zämä mid de Uirner Fähndler und Alphornbläser das Jodlerfäscht vorgstellt. De Christoph Gähwiler als Redner hed’s belzig verstandä, dä Alass schmackhaft z’machä, aber ai grad bemerkt, dass der Transport s’ grescht Problem seyg wo nid wenig Sorgä miäch. Spitzemässig hend diä beedä Cheer «Alpenacht» vorträid und derzue ä Wärbefilm la laife, wo s’Tipfli vo derä Fäschtvorstellig gsi isch. Es lebe Andermatt 2021.
65. Zentralschweizer Jodlerfäscht 24. - 26. Juni in Sämpach
D’Sämpacher Jodler sind go guglä und hend näb etliche weytere Frage nu wellä wissä wo dass es diä scheenschtä Sunne-n-Undergäng gäb und eb Jesus ä Jodlerfrind seyg? Wättermässig sells ai besser wärdä weder 1997, wo’s deräwäget nass gsi isch, dass mä mid Traktore hed miässä d’Aito zum Plurpp uis ziäh, nid z’redä vo dä dräckigä Chleider. Ä Vorgschmack uf das Fäscht hend sie midem Fäschtlied «Üse Chor» vom Emil Wallimaa abgliefered und ai der Zuespruch ubercho.
Neywi Jodlerzeytig, ja oder nei
Zuegäh der Vorstand vom EJV isch i derä Sach nid untätig bliebä und isch bemiähd gsi ä Vorlag offä z’leggä wo zwar nid schlächt isch aber nu Verbesserigspotenzial hed. D’Meinigä sind usenand gangä und de Befürworter hed ruichä Gägäwind i s’Gsicht blase. D’Konsultativabstimmig hed bi 417 Stimmabgabä 199 Ja zu 162 Nei bi 56 Enthaltigä ergäh. D’Frag isch ai was diä andere Underverbänd derzue meinid. (Der NOSJV befürwortete an seiner DV die EJV-Bestrebungen mit 72% Ja-Anteilen) Entschiedä wird am 9. März z’Äschlismatt.
Schliesslich erhielt Franz Markus Stadelmann die Ehrenmitgliedschaft des ZSJV zugesprochen. Nach feinem Nachtessen und den Veteranenehrungen begaben sich die Teilnehmenden zu vormitternächtlicher Stunde auf den Heimweg.