Sich es bitzili gärä ha und Rorate

Midem Samichlaishock vom Mändig, 16. Dezämber 2019 isch s’Jodlerjahr 2019 z’Änd gangä. Im grossä ganzä es diänigs Jahr mid etlichä Jodlermässä und emene gued gratnä Jodlerkonzärt. D’Haiptsorg…neywy Mitglieder z’gfindä bestahd nach we vor und isch schwierig. Mier wend nid jamere und luegid positiv firä, de irgend einisch wird eys s’Glick vom Tichtigä zur Seytä stah.
A dem Mändigabig hed’s reychlich Läbchueche mid Neydlä, spanischi Nissli, Mandarindli, Schoggälädli und Traksami gäh. Chley gmiätlich zämähockä hed sehr gued t’ah und mä hed’s gnossä. Mid der letschtä Prob wo mier nu firä Rorate-Gottesdiänscht g’iäbt hend, hemmer 2019 ad acta gleid, gniässid es paar Feriätäg bevor’s de am 6. Jänner wieder vo vorä afahnd und s’neywi Jodlerjahr sey Afang nimmt.

Rorate caeli isch ä Mässfeyr im Cherzäliächt gsi wo mier zum zweitä Mal nach 2018 gsanglich mitgstalted hend. Friähuifstah isch zwar nid oder nimmä jedermann’s und Frai’s Sach, es erstuind aber gleych, wenn s’ganzi Gsangsgremium am Morge am 05.15 h zum Isingä parad gstandä-n-isch und de am Morged am Sächsi ä Leischtig abriäft, wo z’gfallä gwisst hed. Ganz im Bewusstsey em Chilävolch diäned und z’Morgä verdiäned z’ha hed mä sich nach derä Mäss wieder i d’Schlafgemächer zruggzogä um diä verpasstä Schtundä Schlaf nu nachäz’holä. S’Chrischtchindli cha jetz mid guetem Gwissä cho, de ai ihm hed dä feyrlich Momänt mid eysnä Liäder und Juiz gfallä.