Am Eidgenessische Dank-, Buess- und Bättag z'Stansstad, Sunntig 15. Septämber 2019
«Bättid freyji Schweyzer bättid, Eure fromme Seele ahnt, eure fromme Seele ahnt»….so stahds im Schweyzer Psalm…und wenn s’Dankä, Buess tued und s’Bättä (vielleicht) us der Modä cho isch, so tued mes mindeschtens einisch im Jahr grad a dem Tag es bitzli intensiver.
Da und dett wird a dem Sunntig ai Erntedank gfeyred, was z’Stansstad dr Fall gsi isch. Einisch mee hemmer d’Ehr gha im Schnitzturmdorf i dr Chilä derfä go singä und hend’s gärä gmacht. Dass derbiä d’Landeshymne nid gfällt hed, isch ai klar und mier Jodler hend, dank Spick-Zädlä voller Inbrunscht i dä Lobgesang i-gstimmt und diä Passagä «Gott den Herrn im hehren Vaterland» zämä midem Chilävolch tadellos gmeischtered.
Eysi Gsäng hend z’gfallä gwisst und na Chiles hed der Pfarrer Bühlmann gmeint: äs isch immer scheen we-n-iär da sind. Wemä jetz diä Uissag chley voreilig beurteilt, so darf mä ohni uberheblich z’sey sägä, är hed rächt gha, de diä Leischtig vo mier abgriäft hend isch suiber derthär cho und uf offeni Ohrä gstossä. Dä warmi Applais wo’s gä hed, isch Uisdruck gnueg gsi.
Na Chiles hemmer uf der Chilästägä nu der «Alpmorge» gsungä, äs Glesli Siässmoscht trunkä und der Rescht vo dem prächtige Sunntig i Agriff gnu.
Dr Prediger hed i seynä Votä ai nu vom Hirtebriäf vo de Schweyzer Bischef verzelld wo sie allig zu dem Tag verfasst hend, wo a dem Sunntigallig vorgläsä wordä isch und wo’s jetz nimmä gid. D’Bindner Regiärig wo das uifrächt ghaltä hed, dett druis hed dr Pfarrer Bühlmann vorgläsä. Zum Schluss hed d’Lektorin vom Rainer Maria Rilke folgende Värs vortreid:
Herbsttag
Herr: es ist Zeit. Der Sommer war sehr gross.
Leg deinen Schatten auf die Sonnenuhren,
und auf den Fluren lass die Winde los.
Befiehl den letzten Früchten voll zu sein;
gib ihnen noch zwei südlichere Tage,
dränge sie zur Vollendung hin und jage
die letzte Süsse in den schweren Wein.
Wer jetzt kein Haus hat, baut sich keines mehr.
Wer jetzt allein ist, wird es lange bleiben,
wird wachsen, lesen, lange Briefe schreiben
und wird in den Alleen hin und her
unruhig wandern, wenn die Blätter treiben.