Echo vom Pilatus

Hergiswil am See

  

 

Jodlerkonzert vom Samstag, 13. April 2019; abwechslungsreich - unterhaltsam - wohlklingend und gemütlich

Am Tag der nah gsehd alles ganz anders uis. Einerseyts hed me sich im Vorfäld ubere Bsuecheruifmarsch scho miässä Gedankä machä, will zäntumä weyteri Veranstaltigä stattgfundä hend. Anderseyts isch uf eyses treyi Stammpublikum äinisch mee Verlass gsi, eso, dass mier mid 450 Bsuecher ganz ä gueti Teilnähmerzahl hend chennä registriärä. Und dermit sind mier sehr zfriedä.

«Härz mis Härz, was tuesch nu truirä, lueg der Winter isch verbey» heisst’s im erschtä Satz vom Liäd «Dr Früehlig chunt» vom Hans Müller-Luchsinger. Dermit hend mier probierd es bitzli Friähligsstimmig nach dem wolkeverhangene Tag, wo’s de am Abig nu grägned und speter ussä gschneyd hed,  i Loppersaal inäz’bringä. S’Wettliäd vo Schötz, wo d’Klass 1 ergäh hed duezmal isch ganz gued ubere cho und isch es Abbild vo de gleischtete Dirigänte-n-Arbet vom Hans Setz. Dr «Hergiswiler-Juiz» mid de Solostell vom 1. Bass am Afang hed Premiere gfeyred.
«Ohni Sorge» (Hans Aregger) redt vom Bluescht a de Bäim, wo d’Ärnti alli Härze weyt macht. Vo Sorgebrächertee isch d’Reed und vom sorgäfreyjä Läbä, ubermiätigem Tue und der Quintessänz, dass das es läärs Portemonnee chennt zur Folg ha. Sehr gued gfallä hed dr «Aaregg-Juiz» vom Hans Setz, wo d’Heiterkeit und s’Campingläbä  z’Brienz und d’Weyti vom Haslital beschreybt. S’4. Teili chund dermassä rassig derthär,  dass mä chennt meinä es Motorboot  mit Turbogschwindigkeit donneri ubere Brienzersee. 
Gmächlichkeit redt usem Lied «Im Buechewald» (Edi Gasser) wo s’Natuirwunder vo de verschiedene Jahreszeytä  zum Uisdruck bringt. S’jungi Griän wo i dr Sunne glänzt, d’Buechenissli wo reyfid und mahnid, dass mä d’Farbäpracht gniässä sett bevor d’Winternacht chund. Dr «Schofäldjodel» (Remigi Blättler) und «I Bärg und Fliäh» (Tony Zibung) hend wohlverdiäntä Applais uisglest und sind Zeichä gsi, dass diä gwehltä Liäder und Juiz bim Volch sehr gued aa-cho sind. Ohni Sorgä simmer nid, bimeid nid, de sitt geschter am Abig nach Mitternacht stand mier ohni Dirigänt da und jungi oder bstandi Sänger wärid oder sind sehr willkomme. Mier jamerid aber nid, viel meh hemmer Fräid a dem gued glungnä Jodlerkonzärt 2019!

Eysä Gaschtklub isch vo Romoos usem Centovalli vom Kanton Luzärn cho und heisst Jodlerklub «Edelweyss». Diä drey Fraijä und 18 Mannä im beschtä Alter hend gueti Jodlerchoscht vortreid und sind ä Bereycherigi vo eysem Jodlerabig gsi. Sie hend ä gueti Visitechartä abgäh und sind ä wirdigä Verträter vo derä Natuirjuiz-Region.

S’Jodelduett Cindy und Corinne Rohrer vo Sachslä sind am Akkordeon vo ihrer Tantä  Heidy Rohrer begleited wordä, wo a Stell vo de Tanja Fallegger de Begleitpart gspielt hed. Zwe filigrani Stimmä, wo uisgezeichnet zämäpassid und ganz souverän uifträttä sind.

Kapälle René Jakober lad keini Winsch offä. Was der Kapällmeischter und Bläser René, de Akkordeonischt Markus Wicki, de Pianischt Dani Wigger und de Bassischt Daniel Bühler darbote hend isch ganz grossi Klass gsi. Vor allem «s’Windspiel», aber ai «Feriestimmig i de Biberegg» oder «vo de Innerschweyz i d’Lauene», sind suiber interpretiärti und hochstehendi Titel gsi, wo es diszipliniärts Publikum, mugsmeysilistillä konsumiärd hed. (S’hed Sältäheitswärt, dass mä im Loppersaal währed de Muisigvorträg so ruehig gsi isch. Normalerweys isch’s eso, je leyter d’Muisig umso leyter wird gschwafled.) 

Lobendi Wort verdiänd ai de Moderator Beat Tschümperlin. Der mittlerweylä pensioniärti Radiomaa isch sehr gued vorbereited uf der Bihni gstandä und hed seym Job alli Ehr gmacht.  Diä  zämäträitä Informationä hed är ufene verständlichi und lockeri Art a Maa d’Frai bracht und verfiägt ubernes breits Wissä, was d’Spartä Jodlä und Volksmuisig betrifft. Und wenn är’s nid oder nunig weiss, de gahd är go suechä bis är’s hed. Isch sehr z’empfälä und..mä cha-nä-nu zahlä!
S’Jodlerkonzärt 2019 isch Gschicht, diä heimatlichä Teen hallid nachä und sägid: Scheen isch’s gsi und Fräid hed’s gmacht!