Echo vom Pilatus

Hergiswil am See

  

 

S'isch Jodlermäss gsi zum Muettertag, Sunntig 12. Mai 2019

Geschter hemmer i dr Hergiswiler Pfarrchile zur Ehr vo allnä Fraijä und Miättere, aber ai em Herrgott z’Ehrä gsungä und hend ahand vo Rickmäldigä ä gueti Leischtig abgriäft. Sogar der Vikar hed Fräid gha, will är s’erscht Mal ä sonä Jodlermäss live miterläbt hed.

Es gäbt ja unzähligi Chilägsäng fir Jodlercheer, mier hend eys aber uf «s’Herrgott mier stend vor Dier» und «Mit Deym Sägä» vom Joscht Marty entschiedä. Zum Izug hemmer «Dr Friählig chund» vorträid und zur Gabäbereitig dr «Aelggi-Juiz» gwehlt. Traditionsgmäss gherd zum Sanctus em Thomas Wieland seys «Heilig» und bi der Kommunion hemmer dr «Schofäld-Jodel» gsunge. Uf s’täglich Brot hemmer miässä verzichtä, will alli d’Hostie fir s’Chilävolch bruicht wordä sind. Zum Uiszug hemmer «Im Buechewald» agstimmt und dussä uf der Chilästägä simmer nu zum «Alpmorge» und Juiz zämägstandä. S’isch ä gfräitä Sunntig gsi wo Liäd und Juiz prächtig zämäpasst hend.