Echo vom Pilatus

Hergiswil am See

  

 

Fronleichnam in Obbürgen - ein gefreutes Erlebnis

Zehn Tage nach Pfingsten wird in den katholischen Regionen das Fronleichnamsfest gefeiert. Z’Nidwalde isch das der Aplistag und wird ganz fäschtlich begange. Verschiedentlich hemmer a dem Dunschtig  scho derfä Obbirger Gaschträcht  i Aspruch näh und nach feyf Jahre simmer heyr  i dem idyllische Derfli oberhalb vo Stansstad wieder einisch uf Afrag vo der Jugendgruppe z’Obbirge z’Gast gsi. S’isch ganz ä idricklichi und gfräiti Sach gsi.

S’hed eigentlich ganz u-christlich agfange, vorallem darum, will me nachem Isinge i dr Chile Kaffee mideme Gutsch heiligem Wasser hed chennä gniässä, bevor’s de ufä Marsch Richtig Lourdesgrottä gange-n-isch. Gemächlichen Schrittes isch es de inä Waldliächtig gange, ganz es schattig’s Plätzli, wo mä sich zu dem Fäschtgottesdiänscht versammled, dä mier mid Jodelliedere und Natuirjuiz mitgestalted hend. Eysi Darbiätigä sind mid warmem Applais bedacht worde eso, dass mier gärn ä Zuegab agstimmt hend.

Volksverbundener Pfarrer
Amene Feyrtig z’Chile gah wo gjodlet wird isch s’einti,  aber ä Pfarrer ha wo sehr glaibhaft prediged und Fronleychnam neecher erleytered, was firne Bedeytid dass das Fäscht a sich hed isch s’anderi und ganz speziell gsi. Dr Pfarrer Franz Bircher hed das uisgezeichnet gmacht und i seym Predigtwort Paralle vo friächer zu hit zoge, Erinnerige la uifläbä und z’verstah gäh, dass mier jedä Tag Fronleychnam heigid. Erwähnenswärt isch ai, dass am Landsgmeindssunntig (letzter Sonntag  im April) und a Fronleychnam niä prediged worde-n-isch. Dr Pfarrer Franz hed aber uf so interässanti Art zum Chilävolch gredt, dass äs es churzweylig’s Zuelose gsi isch und mä nid uf  d’Uir g’luegt und sich fragt hed: wett är ächt nid herä redä? Und uberhaipt, s’isch erläbti Chilä gsi, was sich a dem Ort vom Gebät, der Stilli und Rueh abgspielt hed. Nachere guete Stund hed sich d’Fäschtgmeind in unmittelbarer Neechi a Tisch gsetzt und i gselliger Rundi s’gmiätich Zämäsey gnossä.

Mier dankid ganz härzlich
Liebi Gastgäber vo der Jugendgruppe.  Dr Abstächer vo de Hergiswiler Jodlerschar zu Eych uf Obbirge hed ächti Fräid gmacht. Ganz be-idruckend was ä sonä Dorfgmeinschaft fertigbringt. Mä gherd zämä, gahd midenand as Wärch und zeigt Fräid wenn’s gratä-n-isch. Iär sind es wahrs Sinnbild vo Gmeinschaft. Mä gsehd’s und gspiert’s. Es sind nid lääri Wort Iär läbid’s ai.
Liäbä Pfarrer Franz. Etappäweys wirsch Dui Dich vo deynä, dier liäbgwnunnene Obbirger, verabschiede und diä wohlverdiänti Pension aträttä. Vo Härze megid mier dier dä neywi Läbesabschnitt gennä, obwohl’s sehr schaad isch, will derä geischtlichi Würdeträger ä Raritet sind.  Fir alles aber, was Dui im Diänscht vo der Chilä gmacht hesch und i chleynerem Mass hoffentlich nu tue wirsch, demmer härzlich danke und hoffid fescht, der Schepfer aller Wältä meg all deyni guete Wärch vergälte.

2015 Webmaster Echo vom Pilatus