Jodlermesse zum Muttertag, Sonntag, 11. Mai 2025

We jedes Jahr hemmer ai heyr em Herrgott z’Ehrä gsungä
und de Fraijä und Miättere Wirdigung entgägäbrungä
und es stills Gedänkä
demmer ai eysnä verstorbene Frind und Genner schänkä
und gahd der eignig Wäg de einisch z’Änd
und mier vo derä Wält de Abschied nänd
de hoffid mier nid nur ä chley
ä Platz im Himmel seyg nu frey

S’hed friäh Tagwach gäh hit, will diä Jodlermäss a-gstandä-n-isch, aber bi dem Prachtswätter hed sich das Friähuifstah glohnt und wenn de zum Istieg nu Kaffee und Gipfilignuss offieriärd wordä sind, de nimmt mä das chley glassener und macht das wo «befohlä» wird.
Zerscht hemmer d’Stimmbänder a-gwermt und nachhär ä gueti Schtund lang s’Programm durägsungä. De simmer i d’Chilä durä gluffä und hend uf der Orgele Position bezogä und gwarted bis d’Chilägloggä verklungä sind.
Im Verlaif vo derä Feyr hemmer verschiedeni Vorträg us der Marty-Mäss vortreid. Der «Bätruef-Juiz» vom Annio Wallimann, das Hohelied zur Gabäbereitig midem Solo durä Bruno Hodel hed ä bsundere Idruck und Glanz erweckt. Ai s’Heilig us der Wieland-Mäss isch prächtig derthär cho.
Wenn d’Silvia Windlin eys dirigiärt, teend’s eifach anders, und das hed mä gspiert. Sie hed’s de ai z’merkä gä, will nach jedem Vortrag zwe Deymä obsi gluegt hend, was sevu bedeyted, dass sie zfriede gsi isch, mier scheen uf ihri Händ gluegt hend und voll konzentriärd bi der Sach gsi sind. Ihrä gilt grossä Dank fir s’Cho und ihri Bereitschaft, ganz bsunders drum will sie am Vorabig Jodlerkonzert midem Joderklub Alpnach gha hed und vermuetlich speter go liggä isch.
Wenn vorgängig gwissi Sache fir Erger gsorgt hend, so simmer de dank «Hollywood-Applais» zur Chilä uis und hend uf der Stägä nu ä Juiz fir dä neywi Prachtstag äs Dankescheen himmelwärts gjuized. De hed sich diä sangesfreidigi Gildä uifgleest und isch im privatä Chreis go Muettertag feyrä.