Nichtkranzer-Schwingfäscht am Sunntig , 28. April 2025 wieder am gleychä-n-Ort we am Samschtig

Bereits zum 43. Mal gelangte das Ob- und Nidwaldner Nichtkranzerschwingfest zur Austragung. 81 Athlethen hatten sich angemeldet und womöglich wollte jeder als Sieger vom Platz gehen, was aber nur einem Teilnehmer gelingen konnte. Im Schlussgang standen sich Ivan Felder Ennetmoos und Markus von Ah Giswil gegenüber. Nach 6:30 Minuten entschied Felder dieses Treffen mit Lätzzu seinen Gunsten.

S’isch Tradition, dass d’Schwingersektion Hergiswil das Träffä organisiärd hed. Obwohl d’Wätterprognose nid uberuis verheissigsvoll g’luited hend, isch der Petrus Schwingerfrind gsi, hed Scheenwätterwolkä uisäghänkt und ä liächti Bisä la blase, und dermit fir optimali Voruissetzigä fir dä Hosälupf gschaffed.
Das Fäscht hed nid we am Vortag scho am Morged am Siebni a-gfangä, d’Notäbletter sind erscht am halbi Neyni abgäh wordä, d’Kampfrichtersitzig hed am halbi Zähni stattgfundä, d’Schwingerbesammlig mid Appäll isch am viertel vor Zähni gsi und s’Aschwingä hed am Zähni agfangä. Nach drey Gäng hend d’Schlussgangteilnähmer scho voorä mitgmischt und sind punktemässig midenand uf Tuechfihlig gsi. Ei Punkt d.h. 48.50 und 47.50 isch der Underschied vorem Schlussgang gsi.
Uiffallend isch, dass diä Teilnahm a dem ONSV-Nichtkranzerfäscht fir d’Verbandsschwinger ä Bedingig gsi isch, dass sie am Kantonale Schwingfäscht z’Sachslä vom 1. Juni 2025 chenid teilnäh.
S’isch nateyrlich ai wieder gmuisiged, g’jodlet, Fahnä gschwungä und ai g’ässä und trunkä wordä. Ä gmiätlichi Atmosphärä hed sich breit gmacht, wo mä gärä zum redä und eifach chley Sey gnutzt hed. Wer mee Wärt uf d’Underhaltig gleid hed, hed chennä s’Ländlertrio Auf der Maur /Schmidig losä, isch i Gnuss vo Jodlerteen dur s’iheimischi Echo vom Pilatus cho, s’Duo Sarnersee hed Alphorn blasä und der Raphael Kälin und sey Kolleg hend Fahnä gschwungä. Grad eso we-m-es gärä hed.
Hergiswil isch s’nechscht Jahr am 26. April 2026 Gastgäber vom Ob- und Nidwaldner Kantonalschwingfäscht. OK-Presidänt isch der Gmeindspresidänt Daniel Rogenmoser
Am Tag dervor am 25. April findet der kantonali Nachwuchsschwingertag statt.
Mier wartid jetz bis es heisst: «Chächi Mannä, chächi Sennä wachsid usem Chiähjerschtand» und
«isch der Hoselupf verbey tued me nu eis fäschtä, trinkt mä nu es Glesli Wey grad vom Allerbeschtä»