66. Zentralschweizerisches Jodlerfest in Menznau 27. bis 29. Juni 2025

Zämä bisch mid Freid derbiä,
ja das macht de gar kei Miäh
leider isch das Fäscht verbey
scheener hätt’s nid chennä sey!

Dieser Vers besagt eigentlich alles. Vorzügliches Festwetter haben sie bestellt, gute Laune herrschte, vorzügliche auf gesanglich sehr hohem Niveau dargebotene Vorträge waren zu hören, optimale ÖV-Verbindungen konnten genutzt werden. Und… was ganz besonders rühmlich zu erwähnen ist: s’hed sehr vieli und rund um d’Uhir suiberi WC’s gha !!!.
Fazit: Mänznai hed alles gä! S’Dorf im Luzärner HInderland isch uber sich uisä gwachsä und hed midere Afischä uifgwarted, wo erschtuind, wo aber ai es grosses KOMPLIMÄNT, DANKESCHEEN und BRAVO verdiäned. Iär derfid stolz sey uf Eych!!

Mier hend zwar nid aktiv am Jodlerfäscht teilgnu, lediglich ä Fängruppe isch go luege, losä, schwitzä und vor allem go gniässä.
Eysi Gsangskameradin Manuela und eysä Edel-Tschogger Bruno hend sich fir das Fäscht agmälded und hend sich der Jury gstellt. D’Manuela hed mid ihrem Einzelvortrag «Hit bi-ni z’friede und froh» (Alex Eugster) en Topleischtig abgriäft wo erstklassig benotet worde-n-isch. Me darf mid ruehigem Gwissä sägä, dass sie ä Jodlerperlä midere ganz goldige Stimm isch. Das Eis isch meh als nur verdiänied, sodass mä gärä gratuliärä dued.
Mid ihrer Muetter, em Gaby von Rotz - Buecher, isch sie ai im Duett uifträttä und zämä hend sie «Bärgfreude» vom Kurt Mumenthaler la erklingä. Ai das isch ä souveräni Sach gsi. Ä wahri Freid, ä Hergnuss, da hed s’Resultat nur Klass eis diä logischi Folg chennä heissä. Dankä fir diä flotti Darbiätig und Gratulation fir diä ersungnigi Klass eis.
Es Komplimänt hed ai der Akkordeonischt Urs Müller. Dä sehr versiärti Ländlermuisiker, isch bi beednä Vorträg ä sichere Wärt gsi und hed ai wesenltich zum Erfolg beytreid.
Der Bruno hed’s nach Jahre wieder probiärd im Duett mid de Cornelia Wicki amene Jodlerfäscht uifz’trättä. s’ Meitschi usem Aentlibuech (Walter Näf/Josef Lustenberger) hed wunderbar passed und ai der Handergeler Röbi Küttel isch derä Sach sicher gsi. Diä erschti und die dritti Strophe sind sehr gued gratä, nur bi der zweitä im Jodelteil, hed’s Triäbigä gä. A was das dä «Wischer» glägä-n-isch oder hed chennä sey, chamä rätslä. s’Verdikt isch us der Sicht vom Coni, wo-n-eim duired hed, midem Gestikuliärä vo de Händ sofort klar. Diä a-gstrebti Klass Eis isch es guet’s Zwei wordä. Wenn’s ai schmärzt und weh tued, es Zwei isch immer nu es Zwei und mues gsungä wärdä. Us derä Perspektivä macht diä Notä ai Freid und isch Grund zum Feyrä. Mier gratuliärid ai em Duett Wicki- Hodel zum erreichtä Resultat und riäfid zue:
s’nechscht Jodlerfäscht das chund bestimmt
und wemä im Duett dett dra teil nimmt
de isch s’Ziel klar, wo me scho weiss
und luited eifach: Klasse eis!
Mier drickid de z’Basel beed Deymä und weyschid gued’s Glingä!!