Behördengedächtnis in der Pfarrkirche Hergiswil, Sonntag, 15. September 2024

Äs isch scho fascht Tradition, dass mier Jodler am Eidgenessischä Dank- Buess- und Bättag dä Sunntigsgottesdiänscht gsanglich umrahmid. Diä Jodlermäss ohni politische Hindergrund wird als Behördegottesdienst gefeyred, womä ehemaligä Politiker gedänke dued, wo aber ai diä aktuelle Amtsträger zum mitfeyrä igladä sind.
Eysä Gsang isch, wemä de Uissagä vo Chilägänger darf Glaibä schänkä, ganz gediegä gued derthär cho. Eigentlich gar nid so abwägig, wemä weiss, dass mier ä gueti Schtund im Chiläzenter änä i-gsungä hend. Und wemä i de Dirigäntin ihri Handzäichä befolgt hed isch sie zfriedä gsi.

Herrgott mier stahnd vor Dier, Dier Herr und Bätruef-Juiz sind eigentlichi Paradestuck vo sonere Mäss und wenn sie de mid Inbrunscht vortreid wärdid und himmelwärts fahrid, de verfählid’s d’Wirkig nid und lend eim la i-sich gah und schaffid Ruim, das Gherti z’verdaijä.

S’Heilig zum Sanctus isch es Hochgebät und gsanglich gar nid so eifach vorz’trägä. Es isch es Dankescheen a Schepfergott fir alli Gabä, aber ai fir alles das, was mier nutzä und gniässä derfid und nid z’letscht fir’s Läbä wo mier gstaltä und verwaltä chenid.

Mid Dym Sägä wemmer gah, isch fascht zum Schluss erklungä womä usem Text cha näh; d’Fräid sie strahled uis hei i jedes Huis, fort mit Zank und Stritt, Friedä alli Zyt, miässt diä ganz Wält gherä. Dä Hilferuef isch wohl i der Chilä z’gherä gsi, wo aber d’Uiswirkigä bleybid stahd ufmene andere Blatt.

Dä Chilägang leyd sitt Schtundä zrugg. Diä Liäder und Juiz klingid nachä und erinnerid eys anä Bättag, wo zwar we üblich verluffä-n-isch, aber ai Momänt gah hed, wo-n-eim bewusst machid, dass mier ä scheeni Heimat hend , nooch bim Lopper juizid und I Bärg und Fliäh derfid derheimä sey.