Handwerksmarkt in Isenthal, Sonntag, 22. September 2024
Erläbnisreychä Tag im Isithal verbracht
Me weiss es, dass es Isithal im Ürnerland gid und es isch bekannt, dass diä dett obä jedes Jahr ä Handwärksmärcht hend. De hed mä ai scho gherd, dass Hergiswil das Bärgdorf mit seynä 470 Iwohner uf 780 Meter uber Meer finanziell dued understitzä. Wer, we mier Jodler nu niä dettä gsi sind, hend äbä am Sunntig derfä Gaschträcht gniässä.
Das schmucki Derfli hed sich fir diä vielä Leyt richtiggehend uisäputzt und isch vo der beschtä Seytä zeigt. Es gschaffig’s, wärchig’s und z’friednigs Velchli isch dett derheimä, macht kei grossä Wäsig wenn uf ei Chlapf sevu Leyt verbey chemid. Sie nähmid’s i Empfang, we wenn neyd passiärd wär und sind vermuetlich saift so froh, wenn’s de nachem Uifenthalt wieder dett härä gahnd wo’s här cho sind.
Obwohl’s gheissä hed midem ÖV a-reisä, hed’s derä difigä Cheibä gäh, wo nid wissid was ÖV heisst und mid der eigetä Blächbichsä obsi bloched sind und diä spärlichä Parkplätz belagered hend.
Nach der Areis imene sehr guet beladnä Aito-AG-Uri-Bus wo d’Sitzplätz ä Raritet gsi sind und d’Stehplätz-Kapazitetä fascht Chreyzbeygimässig gnutzed wordä sind, sind mier a besagtem Ort wohlbhaltä acho, hend eys umägluegt und sind de nachere Kaffeepaise zum Isingä zämächo. Am halbi Zwelfi isch der erschti Uiftritt ufem Schuelhuisplatz erfolgt wo mier nachem Alphornbläser Peter Gasser und vor der Trachtägruppä Bürglä UR, drey Vorträg darbottä hend wo mid Applais verdankt wordä sind. Gley druifnachä hed’s im Hotäl Uiri-Rotstock Zmittag gäh und mier hend nu schiär miässä prässiärä, dass mer der zweiti Uiftritt am gleychä-n-Ort nid verpasst hend. Äs hed de gäbig glänged und mier hend eys chennä Zeyt nä und ä gmächlichi Gangart zuez’leggä. Zumene Kaffee hed d’Zeyt ai nu glänget mä hed sich mid Bekanntä troffä und sich i’grichtet d’Besichtigung vo denä verschiedene Schtänd vorz’näh. Um diä Drey umä am Namittag hemmer de ufä Bus gwartet. I dem Wagä-Konvoi isch s’Gschtungg nur der Vorname gsi und bi denä verschiedene Haltestellä wo Passagiär zuestiegä sind, sind diä ubervollnä Bus nu vollner wordä, sodass mä im Wagä-Innere d’Ändstation Bahnhof Altdorf sehsichtig erwarted hed. D’Durchsaag: «Endstation alle Aussteigen» isch ä Wohltat gsi.
Fazit vo dem Reisli. Mier hend e bitz heili Wält a-troffä, mier sind inere Region z’Gascht gsi wo Wander- und Bärglerfrind beschtens kennid. Und mier sind fir einisch neecher am Himmu gsi womä mid guetem Grund darf uifäluegä und sägä: Herrgott, hesch Dui d’Wält scheen gmacht!!