Am Muettertag ai em Herrgott gsunge

S'isch Tradition, dass mier Hergiswiler Jodler am heyrdrigä Tag vo de Fraije und Miättere am 14. Mai ai zur Ehr vo eysem hechschtä Herr gsungä und a eysi Verstorbene dänkt hend.

Wenn Jodlermässä friächer ächti Chiläfiller gsi sind, so hed diä Attraktion im Laif vo de Jahr es bitzili abgnu, aber mier derfid eys i Sachä Chilägänger nid beklagä, denn äs hed scheen Leyt gha, wo go losä cho sind.
Ai das Jahr sind verschiedeni Wärch us Komponischtemappä uifgfiährt worde, womä kennt hed, de hed's aber ai derigi drundert gha wo weniger bekannt sind. So hemmer zum Izug dr «Heggä-Juiz» gnu, zum Kyrie «s'Herrgott mier stahnd vor Dier» vorträid und vor der Predig «Dier Herr» la erklingä. Zur Gabäbereitig isch der «Rängg-Juiz» und zum Sanctus s'«Heilig» ufem Programm gstande. Bi der Kommunion hemmer midem «Ziäblä-Juiz» ä chleynere Wischer gha, womä eys grosszigig verzogä hed. Derfir isch de «Mit Deym Sägä» doppled so scheen derthärä cho. Und nachem «Meyetag»  hed s'Chilävolch warmä Applais gspändet. Midem «Alpmorge» und «Bärgler-Juiz» uf der Chilästägä isch de Muetertags-Uiftritt z'Änd gange.
Vorgseh wär nachhär es Ständli bi scheenem Wätter i der Summerbar gsi und bi Rägä hättid mier im Roggerli obä nu eis zwei gsungä.  Dett druis isch neyd worde, will me's abgseid hed. Und gleych simmer de ganz überraschend na Chiles i der Summerbar glanded, hend der Apero gnossä und gmeind wenn mier chämid däg's de nid rägnä. Aber oha, chuim sind mier anägsässä hed's afä rägnä, eso dass mier underem decktä Zält Platz gnu hend und dä jodlerischi Sunntigmorgegruess la verklingä.