26. Mai 2016 Fronleychnam z'Hergiswil

Der hittig «Applistag» oder Griändunschtig nach Pfingschtä isch i der katholische Innerschweyz ä Feyrtig (Feiertag) und wird ai demz'gmäss gfeyred. S' isch einisch meh es Erläbnis gsi, we traditionell aber ai we feyrlich dä kirchlich Fäschttag mit Fäschtmäss und Prozässion begangä wird.

S'isch nid üblich, dass mä amene heiligä Wärchtig so friäh us de Fädere gahd oder mues, aber hit a dem Prachtstag isch's liächter gfallä und einisch im Jahr em Herrgott d'Ehr erweysä cha ja nur vo guetem sey.
Scho zeytig hed sich s'Chilävolch vor der Pfarrchilä versammled und nachem Uisleytä isch dr Franz Bircher vor s'Mikrofon trättä, hed alli Chind Gottes begriässt und eys ai z'verstah gä dass mier midere heechere Macht underwägs sey derfid und bsunders hit mid ihm ufe Wäg gahnd. So hed sich de nach dem Begriässigswort d'Prozässion i Bewegig gsetzt und isch under Muisigkläng ganz gemächlich und vielleicht ai andächtig Richtig Glasi-Areal gluffä, wo dr Wortgottesdiänscht sey Afang gnu hed und mier Jodler Herrgott mier stahdn vor Dier gsungä hend. Nachem Wättersägä hed sich der ganzi Zug richtig Schuelhuis begäh wo der zweiti Teil vo dem Gottesdiänscht gfeyred wordä-n-isch.

Brot fir s'Läbä, Brot ufe Wäg
Dr Pfarrer Bircher isch i seynere Predig ufe Läbeswäg i-gangä und hed gmeind, dass alli wo ufem Wäg seygid ai Brot zum Ässä bruichid oder netig zum uberläbä hend und hed dermit s'gettlich Brot gmeind. Ahand vonere Gschicht hed är erklärt. dass inere Buiräfamilie ussä d'Bibu ufem Chuchitisch glägä seyg und diä seyg äis Tags niänä me umä gsi. Me hed sie gsuecht und eifach niänä gfundä. Sie isch de imene bachnä Brot, wo d'Beyrin i Teig igwickled hed, wieder zum Vorscheyn cho. Und genai sones Brot mid ibachner Bibu hed der Pfarrer äxtra fir hit inere Beckerey la bachä. Ganz träffend hed är während der Predig gmeind: Statt «Filet im Teig», gid's hit uisnahmsweys einisch «Bibel im Teig», womit är s'Chilävolch zum Schmunzlä bracht hed. Na Chiles hed's de dervo bim Pfarrey-Apero Versuecherli gäh. 
S'isch ä wahri Fräid gsi, we dä Bircher Franz prediged hed. Mä cha-n-ihm zuelosä und verstahd sey Sprach. Drum isch der hittig Applistag, fir alli wo z'Chilä gsi sind zumene Fräidätag mid tiäfem Hindergrund wordä, womä gärä zruggdänkt. Scheen isch gsi, wemä under denä Voruissetzigä go jodlä darf.