Echo vom Pilatus

Hergiswil am See

  

 

Am Muettertag isch Jodlermäss gsi

S'isch en alti Tradition, dass mier am Muettertag, zur Ehr vode Fraijä und Miättere i dr Chilä singid. Es isch ai es Zeiche vo der Verbundeheit und vom Dank eysä verstorbene Klubmitglieder, Familiäangehrigä und Frind und Genner gägä-n-uber.

Sie sind gued aacho eysi Juiz und Liäder, vor allem due hed me's gmerkt, wo diä letschtä Teen vom gschänktä Tag verklungä sind. S'zahlreychi Chilävolch (s'hed ai scho weniger Leyt gha) isch ganz ergriffä gsi und hed warmä Applais gspändet. Ai d'Theologin Fabienne Eichmann isch am Schluss vom Gottesdiänscht fascht i Euphorie uisbrochä und hed fir diä gmegig Undermalig vo derä feyrlichä Schtund ganz härzlich dankä gseid. (Sie hed's ai verstande, i ihrer Predig uf s'Mutter sey iz'gah und d'Wichtigkeit vo de Vättere, Grosi's und Grossdädi's z'erleytere und eys z'verstah gä, dass ai sie ä wichtigä Beschtandteil vo der Familie sind und eminänt wichtigi Funktionä im Alltag uisiäbid.)
Na Chiles hemmer uf der Chilästägä verussä nu es chleyses Ständli gäh, sind i d'Summerbar nu eis go ziäh und hend dernah dä Muettertag familiä-intern weyter  gfeyred und gnossä.