Echo vom Pilatus

Hergiswil am See

  

 

Gäste der Hergiswiler Sagmählfrindä, Samstag, 8. Dezember 2018

De Hergiswiler Schwinger gahds guet. Ihres Vereinsläbä verlaift unproblematisch, de s’wird treniärd, zum Gäld gluegt und zwischetinä hend sie sogar nach langem wieder einisch zwe Chränz chennä feyrä , was sevu heisst, dass der Linus Fessler d’Hergiswiler Farbe uf de grosse Schwingplätz verträtte tued.

Traditionsgmäss hend ai mier zu derä Gäschteschar zellt, wo wissä hed wellä ,was rings um d’Sagmählzunft im Lopperdorf gahd. Diä ordentlichä Traktande  hed mä zigig behandled. (Näbäbey gseid wär’s vielleicht nu zigiger gangä, wenn der technischi Jahresbricht nid so langatmig vortreid worde wär.) D’Finanze sind im Lot und d’Wahlä vom Presidänt Reto Blättler, vom Kassier  Philipp Mops Niederbärger und de Abgeordnete fir a d’DV vom ISV und ONSV hend nid z’redä gäh.

ISV-Fäscht 2021
Sehr visionär sind d’Voruissetzigä fir s’ISV-Verbandsfäscht i drey Jahre. Erschti Vorabklärige sind scho troffä worde, so dass Hergiswil mid der Schwingersektion Beggeriäd zämä dä Alass ufem Flugplatz Buochs durefiährä wird. I der Person vom Nationalrat Peter Keller isch der OK-Presidänt scho gfunde, sodass diä anfallende Vorarbete bereits chenid i d’Hand gnu wärde. Es darf es bodeständigs Fäscht erwarted wärde.

We üblich hend miär diä Tagig mid eysnä Gsäng undermalt und dermit d’Gasche i Form vomene währschafte Znacht verdiäned. Mä isch de nu ä chley zämägheckled und hed s’eint und ander Kaffee gnosse.