Echo vom Pilatus

Hergiswil am See

  

 

Den Rorate-Gottesdienst mitgefeiert (Mittwoch 28. November 2018)

Wer’s nu niä erläbt hed, dä packt’s grad gherig de diä Liächterpracht, d’Stilli,  d’Besinnlichkeit und Atmosphäre machid sprachlos und gahnd unter d’Huit.  Es einzigartig’s Erläbnis!

Rorate isch e-n-alte Bruich i derAdväntszeyt. Rorate isch ai s’Afangswort vomene Wächselgsang i dr katholische Liturgie und stammt usem altä Teschtamänt. Diä Feyr wo am Morge friäh vor Sunne-n-Uifgang oder bi Sunne-n-Undergang nur bi Cherzäliächt gfeyred wird isch e-n-Ischtimmig uf Wiähnachte.

Wer stahd scho under der Wuche am viertel vor Feyfi (fascht mitzt dur d’Nacht) uif, dass är de am Sächsi i dr Chilä-n-isch. Mier Jodler hend da mitgmacht und denä rund 100 Chilägänger midem «Gloggä-Jodel», «Wiähnachtsglogge» und «E gschänkte Tag » es grossartigs Gschänk gmacht. Na Chiles hed’s sehr positivi Reaktione uisgleest und s’hed gheisse: hei isch das scheen gis….Iär chenid de gäbig wieder cho.

Diä ganz Feyr isch underem Motto «Liächt fir sich und anderi sey» gstande. Verschiedeni Text sind gläse worde und ä Muetter hed d’Begäbeheit mid ihrem Sohn verzellt wo’s um’s Liächt im Zimmer gange-n-isch.  S’Fazit vo derä Betrachtig zeigt, dass eysi ruichlosi Wält voller Chriäg und Hass, mid Liächt cha erhellt wärde, eso dass s’Dunkel vo der Nacht verschwinde dued oder sett, dass eysi Wält dem Friedä cha entgägäluege, wo mier so sehnlichscht erwartid will mier dä netig hend.   

2015 Webmaster Echo vom Pilatus