ISV - Delegiertenversammlung 2022, Samstag, 5. März im Loppersaal

Die Schwinger-Gewaltigen der Urkantone tagten im Loppersaal. Ursprünglich hätte diese Versammlung am 5. Februar in Beckenried stattfinden sollen, wurde aber um einen Monat auf den 5. März 2022 verschoben und in den Loppersaal verlegt. Die reichbefrachtete Traktandenliste wurde zügig abgearbeitet. Unsere Darbietungen wurden ganz gesittet entgegengenommen und mit wohlwollendem Applaus bedacht.

Hüt gahds luschtig hei juhei, Schwinger sind gottwilche
sigs der Turner früsch und froh, sigs der Senn im Zwilche
chreftig reckid mier üs d’Hand, Schwingerlüüt vom Schwiizerland
so steht es in der 1. Strophe des Jodelliedes «Schwingerlüt von Schwiizerland» von Oskar Friedrich Schmalz nach einem Text von Karl Grunder. 185 Personä sind awäsend gsi, dervo 135 Stimmberächtigti.
Aber kei Angscht, sie hend nid zämägriffä, sie hend bilanziert, gwehlt, g’informiert, d’Statuitä g’revidiärd, s’ISV-Fäscht 2024 uf Mänzingä im Zugerland vergäh und sächs neywi Ehrämitglieder erkorä. Und mier hend diä Versamlig derfä musikalisch begleitä. Es isch ä dankbari Sach gsi, de diä Tagende sind muggsmeysili stillä gsi und hend diä Jodlerteen dankbar entgägä gnu.
Sympatisch ai der Tagespresidänt Reto Blättler vo der Schwingersektion Hergiswil, wo in Prosaform der Tagesverlaif gschildered hed. Dr Nidwaldner Bildigsdiräkter, Res Schmid hed i seynä Wort uber d’Wärt vom Schwingä gredt und a Akzeptanz und Wärtschetzig vom Mitmänsch appelliärd, genai eso we das d’Schwinger im Zweikampf vorläbid.
Der Nationalrat Peter Keller OKP vo ISAF 2022 z’Ännetbirgä hed vomene arbetsfräidiägä OK gredt und verzellt, dass d’Lokalstrass Stans - Ännetbirgä am 3. Juli 2022, ab Pilatuskurvä gsperrt wärdä derfi. Mä hed das Fäscht vom Flugplatz Buochs i d’Härdere z’Ännetbirgä verleid und platzmässig abgspäckt. Vo 7000 Zueschaier isch d’Reed. Das 115. Innerschweyzer Schwingfäscht wird vo de Sektionä Beggeriäd und Hergiswil organisiärd und durägfiährd.
S’ISAF-Fäscht Ibach 2021 isch de ai äs Thema gsi, uber das der OKP, der Ständerat Othmar Reychmueth Uiskunft gä hed. Sie sind nid z’beneydä gsi, diä Schwyzer-Organisatorä, will sie publikums- und wättermässig ziemlich unnä-durä hend miässä. Sie hend sogar dä Chrampf uf sich gnu und s’Stoos - Schwinget ufem gleychä Areal durägfiährd. Eso hed d’Infrastruktuir optimal chennä nutzä wärdä.
Im ISV-Fäscht vom 7. Juli 2024 stahd der Zuger Ständerat Peter Hegglin als OKP vor. S’Fäschtgländ befindet sich bim Fuessballplatz Mänzingä.
Ehrend hed mä ai i de Verstorbene gedänkt allnä vora em Leo Betschart. Zu ihrnä Ehrä hemmer: «Es treicheled heizue» gsungä. Fir diä neywä Ehrämitglieder hemmer der «Älggi-Juiz» parat gha und zum Schluss ganz passend «Ä gschänktä Tag» vo wirklich es Gschänk gsi isch, darbotä. D’Versammlig isch am viertel vor eis (12.45h) als gschlossä erklärt wordä. Der Apero mid Sbrinz-Meckli, Brot, Mineral, Orangämoscht und Weysswey hed Absatz gfundä und s’Zmittag hed de uisgezeichnet gmundet. Zur Unterhaltig hed Kapällä Reto Blättler uifgspielt. Am spetere Namittag hed sich diä Versammlig langsam uifgleest.
Z’hoffä bleybt jetz eifach, dass diä vorgsehnä Fäscht chennid durägfiährd wärdä, wo midem ESAF Prattälä vom 26. - 28. Aigschtä ihrä Höhepunkt erläbä wärdid. De cha mid guetem Grund gsundä wärdä:
Isch der Hosälupf verbey, tued me nu eis fäschtä
trinkt de nu es Glesli Wey, grad vom Allerbeschtä
und i Frindschaft, Hand in Hand, singid mier uf Schwiizerland.