Behördengedächtnis mit Jodlermesse zum Eidg. Dank-, Buss- und Bettag, Sonntag, 20. September 2026 um 10.00 Uhr in der Pfarrkirche Hergiswil

…doch undrem Gwand ganz z’innerscht in, hend mier es Härz voll Heimatsinn…

Wer wurd ächt nid gärä s‘Jodellied «My schöni Heimat» vom Stähli Delf singä, wenn är’s kennti? Da mues me nid lang ratä spontan wurdid alli wo’s kennid und chenid i-stimmä, will’s genai dass seid, womä fühlt wemä Eidgenossin oder Eidgenoss isch. Diä Ehr ha isch tatsächlich ä wunderbari Fiägig.

Mier hend zwar ai heimatverbundni Liäder gsungä, hend um Gottes Erbarmä gsungä und sey Sägä bätted, sind andächtig im Bank uf der Orgele-Empore g’hocked und sind nach anderthalb Schtund zur Chilä uisä, mid der Hoffnig, dass eys der Schepfergott vergälte dued wenn miär hit gfählt hend.

S’isch nid ä Jodlermäss we-n-ä anderi gsi. D’Leyt hend eysi Vorträg sehr gschetzt und ihri Freid mid Applais uisdrickt, aber gleych isch eppis zum Uisdruck cho, wo schwierig z’eruiärä isch. A was dass es glägä-n-isch, isch nid vo Bedeytig, äs isch jetz verbey und diä nechscht Jodlermäss chund bestimmt.

Eppis mues aber gleych nu erwähnt wärdä. Nomalerweys wird a dem Tag d’Nationalhymne gsungä, was mier aber nid macht hend. Derfir hed der Organischt es Chränzli verdiäned, will är zum Uiszug vom Ministerium d’Nidwaldnerhymne interpretiärd hed, wo s’Härz hed la heecher schlah, will i der 3. Strophe drinnä stahd:

Liebe Herrgott, breit Dii Säge uber Volch und Heimat uis.
Hilf is Nod und Chummer träge, bhiet is, Gott, s'Nidwaldnerhuis.
Zangg und Striit und besi Gwalte häb is ab mid starcher Hand.
Hilf is Dui dr Fride bhalte. Herrgot, schitz s'Nidwaldnerland!
Hilf is Dui dr Fride bhalte. Herrgot, schitz s'Nidwaldnerland!

Us denä Wort schepfid mier Chraft und nähmid der Alltag i Agriff, ganz im Bewusstsey, dass mier derfid Freid ha und stolz sey, sonä wunderscheeni Heimat z’ha und drinnä derfä z’wohnä.