Fronleichnamsprozession in Hergiswil, Donnerstag, 4. Juni 2026

Ein feierliches, melodiöses und eindrückliches Ereignis

Fronleichnam wird 60 Tage nach Ostern also am zweiten Donnerstag nach Pfingsten im Mai oder Juni gefeiert. In den katholischen Kantonen ist dieser Tag ä Feyrtig. (ein freier Arbeitstag) Kennzeichnend für das Fest vom Herrgottstag, wie er auch genant wird, ist die Fronleichnamsprozession.

Erfahrigsgmäss isch oder wär scheens Wätter planed und fir das Jahr hed der Petrus Scheen-Wätter-Wolkä uisäghänkt, sodass s’Scheen-Wätter-Programm hed chennä abghaltä wärdä. Logischi Folg, für alli diä geschter nid friäh go liggä sind, hend am Morgä vielleicht nu ä chley Pflotsch i de Aigä gah. Wer dä Tag aber locker i Agriff gnu hed, isch gley wach wordä, will im Tagesprogramm vo eys Jodler sämtlichi Eggpinkt uifgfiährd gsi sind, wo gseid hend wiä, was, wo und wenn

Bi Zeytä hend mier Jodler eys im Probelokal i-gfundä und eysi Vorträg igsungä. Am viertel vor Neyni hemmer eys ufem Chiläplatz parat gmacht, dass diä Prozässion pinktlich hed chennä ihrä Afang näh. Nachem Uiszug us der Chilä und Begriässig dure Pfarrer Schonhardt, isch s’Chilävolch i gmächlichem Schritt under Begleitig vom Muisigverein und Böllerschiss dur d’Herrgotts-Grenadiär zum Glasiareal gluffä, wo inneghaltä worde-n-isch und mier dä Momänt vo der Stilli mid «Herrgott mier stahd vor Dier» darbotä hend. Diä zweiti Etappä, ä Fuessmarsch, hed eys ufe Platz bim Chiläzentrum gfiährt, wo s’Mässopfer gfeyred wordä-n-isch. Dr Bätruef-Juiz midem uisdruckstarchä Solo vom Bruno hed eim richtig gfrorä. Gley druif appä simmer ufä Chiläplatz gluffä, wo der eucharistischi Sägä gspändet wordä-n-isch. Dernah sind alli Chiiägänger i Gnuss vo Chäs und Brot und eppis z’Trinkä cho . Mä hed de nu chley dorfned und isch na-dis-na hei go Zmittagä und hed der Reschtä vom Tag gnossä.
Diä Bellerschiss, diä Jodlerteen und Prozässionsmärsch sind äs Erläbnis gsi und wärdid ai s’nescht Jahr so Gott will wieder z’gherä sey. So we hit am Morgä gemmer alli eysä Wäg, nähmid’s we’s chund und hoffid mier bleybid gsund.