Erntedankgottesdienst in der Pfarrkirche Stansstad, Sonntag, 4. Oktober 2026, 10.30Uhr
Dankbar sey fir das wo mier hend
Trotz mee als nur trochenem Summer, derfid mier eys nid beklagä, will mier alli zämä jede Tag ä decktä Tisch vorfindä derfid. Ai wassermässig simmer gued uber d’Rundi cho, eso dass me eifach dankar sey mues ,will’s kei Sälbverständlichkeit isch.
So we s’letscht Jahr hemmer derfä i der Stansstader Pfarrchile Gaschträcht gniässä und hend mid verschiedenä Vorträg uifgwarted, wo dur eys Premiere erläbt hend. Obwohl s’Grippli wo ohnehin chley isch nu es paar Absänzä hed miässä verchrafte, hend diä wo derbiä gsi sind alles gäh. Letschti Mäldigä sägid, dass es gamz gued teend hed und d’Frai Dirigäntin hed la uisrichtä sie seyg z’friedä gsi.
Ai der Stansstader Gmeindsleiter Michel Bursztyn heig sich denä lobende Wort agschlossä und so we’s uisgsehd, derftid mier s’nechscht Jahr wieder es Gaschtspiel gäh.
I dem Wortgottesdiänscht sind verschiedeni Läsige vortreid wordä wo under anderem vom Weybärgliäd d’Reed gsi isch. S’Gleychnis verzellt, dass ä Frind mid viel Miäh ä Weybärg uf fruchtbarem Bodä pflägt und uf gueti Truibä gwarted hed. Stattdessä hed’s suiri Beeri gäh. Quintessänz isch mä sell niä d’Hoffnig uifgä, will irgendwenn chund diä zeyt wo’s erntemässig wieder obsi.
S’isch im Läbä ja ai eso. Äs gahd ja nid eister graduis, es holpered eppä diä und wemä bi dertigä Täg wett der Picku häräriährä, de wär oder isch mängs nimmä gued. Wer drubert äwäg chund dänkt positiv und seid sich es chund scho gued. Und mid derä Istellig grated’s i de meischtä Fäll. E heisst ja imene Jodellied: Muesch einisch ä chli unndurä, dunkt’s di d’Wält sig nume grau, de nimmsches luschtig’s Liädli firä, s’Gwülch gahd wäg s’wird wieder blau.
Mier hoffid gärn, dass alli wo unnädurä mend oder miässä hend, dass der Herbscht mid seynä buntä Farbä, Freid i s’Läbä bringt und Uifmunerig isch, will s’Läbä wo so läbenswärt isch und läbenswärt macht.
Na Chiles hed’s nu es Liädli und ä Juiz gäh und derzue isch Moscht uisgschänkt wordä.