Jubiläumsschwingfest 75 Jahre Schwingersektion Hergiswil, Samstag, 3. August 2024

Was lange währte ist nun endlich gut geworden. Der verschobene Anlass konnte mit Verspätung bei sehr guten äusseren Bedingungen, relativ guter Schwingerbeteiligung und ansehnlicher Zuschauerkulisse zmitzt im Dorf z’Hergiswil ausgetragen werden.

Hit gahd’s luschtig heijuhei, Schwinger sind gottwilche
sig’s der Turner frisch und froh, sig’s der Senn im Zwilche,
chreftig drückid mier üs d’Hand
Schwingerlüüt vom Schwiizerland
genauso lautet die 1. Strophe vom Jodellied «Schwingerlüüt vom Schwiizerland» (O. F. Schmalz/ K. Grunder). 63 Sagmählburschtä vo gresserer und mittlerer Statuir hend sich a dem besagte Samschtig z’Hergiswil zu dem Schwingfäscht troffä. Äs isch ja ganz erschtuindlich, dass mä sich z’Hergiswil zmitzt im Dorf zu dem Chreftemässä troffe und im friedlichä Zweikampf ä Sieger erkorä hed. Gescht us verschiedene Sektionä sind im Ring gstandä und hend um Zähni, Neyn-Siebäfeyf, Neyni, Acht-Siebäfeyf, Acht-ä-halb und nateyrlich umä Läbigpreys, s’ Rind «Pisa» und Naturalgabe g’kämpft.
Erwähnenswärt isch sicher ai de prominänti Asäger vom Kuonisbärgli, de Odermat Sepp, wo-n-ai ä sehr guete Tschob gmacht hed, we ai sey Assischtänt de Müller Wysu.
Richtigi Schwingfäschtatmosphärä
A derä Uismarchig hend nateyrlich traditionelli Beyträg nid derfä fählä. Obwohl mä s’Fahnäschwingä vielleicht vermisst hed, so hed’s Jodlerteen dur s’Echo vom Pilatus z’gherä gäh, der Pascal Barmettler hed Alphorn blasä, Chrienser Geislächlepfer sind uifträttä und s’Trio Jörg Buecher, Richi Rogenmoser und Osi Zurflueh hend lipfig gmuisiged. Wättermässig hed’s am Vormittag nu diä eintä und andere Trepf abbä griährd, der Petrus hed’s de doch ai i-gseh und der Hahnä zuegschruibed. Ganz gärä isch mä i derä sich langsam abzeichnende Hitz uisgwichä und hed es Schattäplätzli uifgsuecht.
Mier Jodler sind am halbi Zähni zum Isingä aa-trabed, sodass mier am Elfi gued vorbereited der erschti Uiftritt bestrittä und eso s’Zmittag mit heissem Beischinkä und verschiedänä Saläter verdiäned hend. Ai am Namittag hemmer de nu s’eint und ander Liäd und der passendi Juiz vortreid. Rickmäldigä hend ganz positivi Reaktionä uisgleest. Nateyrlich hemmer ai d’Schwingerarbet uf denä zwe Plätz beguedachtet und probiärd z’verstah, wenä Hüfter, Weyberhaggä, Schlungg, Briänzer und we diä weytere Schwing funktioniärid. S’Fazit isch eifach und luited: Zueluege isch viel viel scheener und vorallam kei Chrampf!!
S’OK hed es Zähni verdiäned!!
Da mues mä em OKP Reto Blättler und seynä vielnä fleyssigä Händ äs grosses Komplimänt machä. Sie hend’s verstandä es tadelloses Jubiläumsschwingfäscht uber d’Bihni z’bringä, wo i d’Hergiswiler Schwingergschicht wird i-gah. Midem Stefan Ettlin vo Chärns, wo im Schlussgang de Fabian Scherrer us Uffikon hed chennä bezwingä, hed dä Hosälupf ä wirdigä Abschluss gfundä.
Isch dä Hosälupf verby, dued me nu eis fäschtä
trinkä mä nu es Gleysli Wy, grad vom allerbeschtä
und i Frindschaft Hand in Hand
singid mier uf s’Schwiizerland.
Eb’s nu bis i alli Nacht g’fäschted hend isch nid bekannt. Uf jedä Fall hed s’Sagmähl miässä abtransportärd und d’Infrastruktuir abbuid wärdä. Sie heigid scheyns am Sunntig nu ordili g’chrampfed, sodass am Mändig am Morgä niämer me gmerkt heig, dass am Samschtig und es paar Täg dervor ufem Ressliplatz gfäschted wordä seyg. Eis isch sicher, das Gleysli Wey wo i der 3. Strophä vo dem Jodelliäd d’Reed isch, das wärdid’s ganz bestimmt zu gegäbener Zeyt gniässä. Und verdiäned hend es uf jedä Fall.