Picknickfreuden genossen, Sonntag, 18. August 2024

Chum miär wend i d’Heechi gah
womä zämähockä cha
bräätlä chamä Steak und Wurst
all’s isch da mä hed kei Durscht
Kaffee gid’s und guetä Wey
s’gid es gmiätlichs Zämäsey

Unter der Regie und auf Einladung vom 1. Bass traf sich die Hergiswiler Jodlergilde bei Kamerad Balz Blättler. S’isch e Rägätag gsi und zwischetinä hed’s gläärt was abbä hed megä, doch d’Gäschteschar hed sich vo derä Abbälääretä nid la i-schichtere, mä isch ja am Schärmä g’hocked und hed sich beschtens unterhaltä. Und will s’Schwägalp-Schwinget grad ai nu live ubertreid wordä-n-isch, hed mä dä Hoselupf via Handy chennä mitverfolgä. Nateyrlich hemmer ai gsungä, g’juized, fach-gsimpled und Reminiszänzä vo friächer sind massäweys uistuisched wordä. Weisch nu…hed’s grad mängisch gheissä.
Nach Aperognuss hed mä sich langsam a Zmittag-Vorberereitigä gmacht. A Verpflegig hed’s nid g’fähld. Was da a Filets im Darm, (sprich Cervelats und Bratwirscht) Steaks und weytere Spezialitetä ufem Grill brutzled hend isch ä richtigi Aigäweid gsi. Und diä Salääter, ä erschtklassigi Uiswahl. Und der edli Rotwey we ai Mineralwasser hed de ai nid gfählt. Wer de da nid gnueg ubercho hed isch wirklich sälber schuld gsi.
S’Dessertbüffet hed ai neyd z’winschä ubrig glah. Was diä Bäckerinnä oder männlichä Confisöre anä zaibered hend sind wahri Kunschtwärch gsi. Leider eifach z’viel, sodass der einti oder ander Chueche dr Wäg wieder dett härä gfundä hed wo-n-är här cho isch. Dankä allnä fir diä Backbeyträg. Em Kaffee mid und ohni heiligs Wasser hed mä ai nu eppis derfä rächnä.

Grossmächtigä Dank, liäbi Erschtbässler!
Fir Eychä Isatz, Eyches Derzuetue alli Läif und G$äng, dass das Picknick hed chennä duregfiährd wärdä, dankid Eych alli Gescht ganz härzlich. Ai wenn’s wättermässig nid unbedingt i-ladend gwirkt, so isch d’Gäschteschar gärä cho um sich z’verweylä und gmiätlich zämäsey. Mier dänkid gärä zrugg und im Fall wenn fir diä nechschti Picknick-Uisgab ä Organisator gsuecht wird, de hätt mä bi Eycher Bewärbig neyd dergägä. Iär chenntid it scho und nid erscht morn schop afah organsiärä. Will sehr scheen isch’s gsi und sehr gued hendr’s gmacht. Dankä viel Mal.

Stimme des Gastgebers
Liäbi Jodlerfamili
Herzlichen Dank, dass ihr heute zu uns ins Ried gekommen seid.

Es hat uns sehr gefreut mit euch gemütliche Stunden zu verbringen. Freue mich wenn sich die heutige Harmonie im Jodlerjahr weiter verbreiten wird.

Stimme einer Besucherin
Liebe Balz
DANKE DIEND MIER ...ganz fescht bi dier und dinärä Familie. So ä grossartigi Gastfrindlichkeit derfä z'erläbä und eifach d’Seel la bambälä lah isch eifach grossartig.DANKE💝

Härzliche Dank allne wo eppis däzue bietreid hend .
(Bilder siehe Galerie)