Generalversammlung der Sagmählzunft Hergiswil, Freitag, 22. November 2024

Die Schwingersektion Hergiswil blickt auf ein gefreutes Schwingerjahr zurück. Höhepunkt war zweifellos das Jubiläumsschwingfest auf der Rössliwiese. Frauen- und Meitlischwinget wie auch das Nichtkranzerschwingfest stehen für 2025 an.

Traditionsgemäss treffen sich die Hergiswiler Schwinger und Schwingerfreunde jeweils im November amene Samstag. Heuer war dies vorerst auch so, doch irgendwann kam dann der Freytig ins Spiel, was aus Jodlersicht nid unbedingt vorteilhaft gsi isch. Mä hed sich de chennä arrangschiärä, dass mä liächt dezimiärd im Glaisrestaurant derä Tagig der gsaglich Rahmä hed chennä gäh.
Am Tag dervor hed’s ä scheenä Pläder Schnee anägriährd. Aber d’Strassäverhältnis sind de soweyt härgstellt gsi, dass mä midem Aito verhältnismässig gued firsi cho isch.

Zum Tagigsverlaif
D’ Versammlig hed we eiste ihrä normalä Verlaif gnu. Ai das Jahr hed’s wieder ä ellälangä Tätigkeitsbricht gäh, womä gäbig ä chley chirzä sett, chennt und derft. Aber äbä...entweder mä gherd’s gärä und lost zue, will mä mid Bilder und Kommentär me als neetig i-deckt wird. Oder mä hocked eifach dett und warted bis das Traktandum verbey isch.

S’Jubiläums-Schwingfäscht am 3. Aigschtä uf der Ressliwiesä isch perfekt organisiärd gsi und hed midem Stefan Ettlin us Chärns en wirdigä Sieger gha.

Finanziell gahd’s de Sagmählbuebe und Meitli sehr gued und sie mend nid am Hungertuech gnangä. Es bruicht aber immer wieder Grampolscheybä und Papeyrgäld, dass weyteri Aläss chenid i s‘Aig gfasst wärdä. Zwe derigi chamä s’nescht Jahr im Aprellä bsuechä, Neechers wird mä nu erfahrä.

D’Statuitä hed mä uberarbeitet und diä sind de gnähmiged wordä

Äs isch nid nur gredt wordä, miär Jodler hend zwischetinä ai gsungä und dermit eysi Gaschä i Form vomene feinä Znacht verdiäned. Nach dem Zämäsey hed mä sich de ufä Heiwäg gmacht und isch go liggä.