Ä chley ä anderi Jodlermäss am Bättag, 17. Septämber 2023

Es sind zwar feyrlichi Momänt gsi, wo’s i der Hergiswiler Pfarrchilä hit am Morgä z’erläbä gäh hed, äs hed aber ai anderi gäh, wo’s der Wärt wär drubert z’schreybä. Will d’Asichtä aber verschiedenartig sind oder chenid sey, demmer nid druif i-gah und land’s la sey. Fir eys isch klar, dass sich s’Friä-Uifstah hit sicher lohnenswärt gsi isch. Eysä Gsang hed bim Chilävolch nämlich Aklang gfundä und z’gfallä gwisst, är isch gued gued gratä und hed Fräid gmacht, grad eso, dass är zueversichtlich stimmt, Uiftrieb gid und mä weyter druif uifbuijä cha.

Neyigkeit nummere eis
Fir diä wo’s nunig wissid, sitt em Juni vo dem Jahr stand mier musikalisch under der Leitig vo de Silvia Windlin. Diä ehemaligi Lehreri und schuelpädagogischi Mitarbeiteri verstahds uisgezeichnet, diä Fraijä und Mannä bi der Stangä z’bhaltä, verlangt zwar Einiges, verfiägt aber uber das pädagogischi Gschick, eso dass d’Probä churzweylig und inträssant sind. Diä Frai wo d’Wiesibärger Jodler gleited hed, isch ai jodlerisch uf der Hechi und beherrscht das Metier uisgezeichnet. Fir s’Erschti i der Silvia Windlin a derä Stell es grosses Dankescheen, dass mier sie als Dirigäntin ha derfid.

Und jetz zu derä Jodlermäss vo hit am Morgä
Nachem Izug, wo under Orgelekläng stattgfundä hed, hend mier «Alpmorgä» gsungä, was eher ussergwehnlich gsi isch, will mier normalerweys ä Natuirjuiz singid. S’hed aber kei Rollä gspielt, will Liäd und Juiz i der Chilä sehr gued klingid und jedes Mal ä Bsunderheit darstellid. Zum Kyrie isch «Herrgott mier stahnd vor Dier» uber eysi Lippä cho wo mier inständig gfragt hend: …mier sind voll Fähler nimmsch Dui eys aa? Dr Herrgott hed bekannlich es offes Ohr fir armi Sinder und isch ganz gwiss gnädig gsi, will mier singend um Vergäbig bätted hend. Fir s’«Dier Herr» hed’s de nimmä glänged, will es Alleluja vorem Evangelium ai nu hend miässä Platz ha. (Und näbäbey erwähnt sind nu Chiläliädli gsungä wordä, wo praktisch niämer g’kennt hed, was nateyrlich us Jodlersicht chley stehrend wirkt, will’s Jodlermäss gheissä hed. Aber land mier das, will es dänk derzue gherd.) I dr Predig, isch vo, kirchliche Missbreych, Liäbi, gägäseytiger Vergäbig und Verziäh d’Reed gsi. Mä chennt jetz das Thema uisdeytschä, ganz beliäbig uisweytä und chämt mit Diskutiärä praktisch a keis Änd. Drum land mier das la sey, dänkid eysi Sach und bittid inständig: Herrgott heb Erbarmä mid Eys. Erhabäheit spricht usem «Bätruef-Juiz», wo der Hodel Bruno midem Solo einisch mee ä brillanti Leischtig abgriäft hed. Midem «Lopper-Juiz» zur Kommunion und «Mit Deym Sägä» isch dä Bättag-Gottesdiänscht» z’Änd gangä. Dussä uf der Chilä-Stägä hemmer der dankbarä Zuehererschar «I Bärg und Fliäh» und der «Geburtstags-Juiz» vorträid. Diä eintä hend nu s’Chilä-Kaffee gnossä, anderi sind susch nu i-gchehrd und der Rescht hed der gmiätlich Teil vom Sunntig i Agriff gnu.