Rorate am Samichlaustag, 6. Dezember 2023

Morgens früh wenn anderi nu schlafä dend, mier scho friäh zu de Fädere uisä gend und am Sächsi am Morgä i der Chilä gsungä hend.
S’isch eigentlich nid normal, dass d’Jodler ä Wecker stellid, zmizt dur d’Nacht (halbi vieri, 03.30h) Tagwach hend, am viertel ab Feyfi (05.15h) i-singid und de rächtzeytig i der Chilä (05.55h)ufä Isatz wartid. Normalerweys machid sie durä. (Und hättid vielleicht chley Pflotsch i de Aigä). Will das aber keis Jodlerfäscht gsi isch, chamä das verstah, nimmt’s i Chaif und tued sich engaschiärä. Wenn’s aber fleyssig der Fall wär, de miässti mä uber d’Biächer.

Item, mier hend zu dem Rorate-Gottesdiänscht zuegseid und eys dra ghaltä. Mä cha diä feyrlich Stimmig wo i dem Sakralruim gherrscht hed fascht nid beschreybä , de s’Cherzäliächt, diä Rueh und Stilli hend eim i ihrä Bann zogä, eso, dass mä mid sich sälber beschäftiged gsi isch und dä bsunderi Momänt uf sich hed la i-wirkä.

Midem «Lopper-Juiz», wo mier zum Izug gsungä hend hed diä Mässfeyr agfangä. Äs gherd ai zum guete Ton, dass mier armä Sinder vorem Herrgott gstandä sind und gfragt hend: «Nimmsch Dui eys aa»? Diä Teen sind himmelwärts erklungä und dobä sicher erherd wordä. Ai s’«Heilig», derfti d’Wirkig nid verfählt ha und der «Bärgler» hed i himmlische Sphärä ganz bestimmt ai Aklang gfundä. Zum Schluss vo derä Mäss hemmer «Mid deym Sägä» vortreid und d’«Wiehnachtsgloggä» wo muisikalisch zum Uiszug gleyted hend hend ai nid derfä fählä.

«D’ Wält isch miäd vom vielä Streytä, miäd vo all dem bitträ Leid, doch wenn d’Wiähnachtsgloggä leytid gschpiersch Dui Friedä, gspiersch Dui Fräid», heisst i der erschtä Strophä. Uber s’Chäärä und s’bitter Leid memmer keini Wort verleyrä und machid’s ai nid. Mier hoffid eifach, dass der Satz: «Miädi Wält stach uif sing mit» wo mier ganz nachhaltig und idringlich gsungä hend, irgendwenn einisch wird Wirkig ha.
Eyses Singä hed Fräid gmacht und ohni Uberteybä darf mä sägä, dass diä 14 Jodler ä ganz souveräni Leischtig abgriäft hend. S’nachfolgendi Zmorge im Chiläzentrum, isch we dä glungnig Uiftritt äs tiäfs Adväntserläbnis gsi. S’Chrischtchindli cha cho, mier hend’s verdiäned.