Benefizkonzerte für krebskranke Kinder, Kinderspital Luzern, Kinderspitex Zentralschweiz und Stiftung Theodora, eine wertvolle Erfahrung

Singen für einen guten Zweck, so hed mä Wärbig uf der Homepage vom Hergiswiler Jodlerklub gmacht. Und..s’isch wirklich ä guete Zwäck und spricht d’Leyt aa.

S’erschti Konzärt in Chärns isch durä und hed nachhaltig be-idruckt, nid nur bi de Zueherer ai d’Interprete hed’s durägschittled. Einerseyts wissid diä singende Fraijä und Mannä wemä uifträttä dued, um was dass es gahd und s’gilt ä gueti Fallä z’machä. Anderseyts heisst, Fräid schänkä, und Fräid verteilä. Mä darf mid guetem Gwissä sägä, dass das ganz nachem folgende Värs abgluffä-n-isch:.
Willst Du glücklich sein im Leben
trage bei zu anderer Glück
denn die Freude die wir geben
kehrt ins eigne Herz zurück.
Diä drey Cheer, Alpnach, Chriensertal und «Echo vom Pilatus», alli vo de Silvia Windlin gleited, hend wirklich alles gäh, genaiso, we-s diä vier Zeilä sägid.
Diä ghaltvollä Melodiä hend ihri Wirkig nid verfählt und diä markantä Wort vom Obwaldner Landammä Sepp Hess hend d’Uiswirkigä uf d’Kollektä i Form vonere Papeyrsammlig zur Folg gha.

Gsundheit - es choschtbars Guet
Wenn gsund bisch, luegsch derzue und bisch dankbar. Und wenn das hesch und machsch, de hesch diä halbi Miäti vo Deym Dasey. Was aber isch, wemä vomene Leydä befallä wordä bisch und eim im Deym Tue und Handlä i-schränkt, so dass uf ei Chlapf alles anders wird oder wordä-n-isch? Mä verchlipft, hed schlaflosi Nächt und chas fascht nid verstah, was eim da widerfahrd. S’passiärd nid nur bi de Erwachsene ai Chind chas träffä und da schaffid verschiedeni Institutionä vorbildlich. Sie probiärd de Angeherigä ä Stitzä sey und luegid, dass das frehlich Chinderlachä, wo verlorä gangä-nisch wieder zrugg chund. Ai wenn’s zerscht vielleicht schwierig und uissichtslos erscheynt, d’Hoffnig, Zueversicht und s’Vertruijä i diä ärztlich Kunscht, machts meglich, dass es im Dunklä vom Tunnäl langsam wieder Liächt gid.
Und genai das bezwäckt das Benefizkonzärt. Diä heimatlichä Teen sind Liächt i der Vorbereitigszeyt uf Wiähnachtä. Sie bringid Wermi, Troscht und Helligkeit is Läbä vo Gsundä und Chranknä und gänd Uiftrieb, eso, dass mä mid frohem Mued cha und darf firäluegä, will’s gued tued und lohnenswärt isch’s.
Drum seygid diä beidä Konzärt vom Mittwuch,13. Dezämber 2023 um 19.30 i der Pfarrchilä Hergiswil/NW und am Sunntig, 17. Dezämber 2023 um 15.00 Uhr i der Chilä zu Franziskanere z’Luzärä de Läserinnä und Läser zum Bsuech härzlich empfohlä.