Wieder einisch es Familien -Picknick genossen

Ässä, trinkä, gmiätlich sey und zwischetinä äs Liedli und ä Juiz hend das Zämäsitzä bi perfektä Bedingigä prägt. Nach derä Verschiäberey hed’s jetz ändlich klappt.

Nach siebä Wuchä Paisä hend mier der Iladig vom Emmy Agner, Heidy Rölli, Hedi Mauron und em Martin Blättler im Pistolästand Teufmoos derfä Folge leischtä. Sie hend sich de nid la lumpä und dä prächtig Rastplatz uisgsuecht. Ab Elfi hed’s reychlich Apero mid edlem Weyssä, Orangejus, Mineralwasser, Chäsmeckli und Brotwirfili. S’hed allerhand z’verzellä gäh und mä hed also reychlich Gesprächstoff gha. Dä Redefluss isch nur durä Begriässigsjodel a eysi Gescht underbrochä wordä.

Dass Grosszigigkeit Trumpf gsi isch hed mä de gued gmerkt, vorallem was s’Ässä anbelangt hed. Hesch chennä uisläsä zwischä Pouletbrüstli, s’Schwewynsplätzli und Cervelats. Zuetatä i Form vo verschiedene Saläter hend dä Fitnesstrend nu uifgwärted und hend genai de Winsch vo de Teilnähmer entsprochä. D’Getränkeliste isch genai so umfangreych gsi. Ai dessertmässig isch mä gued ideckt wordä. Näb feinem Eyskaffee hesch chennä Bündner Nussturte und Linzerturte fascht bis zur Bewusstlosigkeit hindere beygä. Wenns’ jetz ä Zeytigbricht gäh wurd, heissti der Ubertitel: Jodler sind Schmarotzer. Da man sich aber bekanntlich sonst wenig bis nichts gönnt oder gönnte, hed das diä finanzielli Seytä nur minim belaschted.
Eis oder mehreri Kaffee’s hend de dä gmiätlich Sunntig la uisklingä lah.

Es grosses Dankeschön gilt em zueständigä OK fir d’Organisation und Duräfiährig, em Partyservice Zibung fir Getränk und d’Verpflegig. S’isch einisch mee super gsi!!