Fronleichnam in Hergiswil, ein Auftritt mit Nachhaltigkeit

Einisch mee, ist man versucht zu sagen, denn unser Auftritt am heutigen Fronleichnamstag,
16. Juni 2022, wurde sehr geschätzt und fand offene Ohren. Erneut erklangen Jodlertöne die zu Herzen gingen.

Nu vor Jahrä hed’s einisch gheisse, mier Jodler dägid im Chilächor dä Uiftritt ewägnäh, was naterlich hinnä und vorä nid gstimmt hed. Es isch ai eyses Rächt gsi, diä Gloria’s und Hosianna’s i volchstimlicher Form himmelwärts z’schickä und das hend mier hit ai wieder gmacht.

S’hed zwar friäh Tagwach gäh, de luit Tagesbefähl isch am viertelab Achti (08.15)h Isingä aagseid gsi und während dem mier diä erschtä Teen vo eys gä hend, hed der Himmu ganz starch bägged, s’hed blitzt, dundered und grägned..und da hed mä de wellä d’Prozässion abhaltä. S’cha nur besser wärdä hed alles dänkt und so isch es de ai cho.

Churz vor dä Neynä hemer eys i s’Chuchichäschtli verschobä, hend s’spändiärti Kaffee gnossä, sind de nachhär gmiätlich i s‘Glasiareal firä gluffä und hend dett uf d’Prozässionsteilnähmer gwartet, Position bezoge und «Alpmorge» gsungä. Diä nechschti Station isch de dr Platz bim Chiläzentrum gsi, wo der Reschtä vo derä Mäss gfeyred wordä-n-isch. «Ä gschänktä Tag» isch vortreid wordä und passender hät das Liäd gar nid chennä sey. Ai der «Bättruefjuiz» isch prächtig derthär cho und hed a Nachhaltigkeit neyd z’winschä ubrig glah. Eifach nur idricklich. S’Chilävolch hed offene Applais gspänded. Der Abschluss hemmer de midem Sägesliäd «Mid dym Sägä» vorem Uifgang i d’Chilä gmacht. Und nachem Schluss-Sägä sind alli zum Apero bim Sigerschtähuisli igladä gsi. Wemä dä Uiftritt im Nachinein neecher betrachted, wird eim bewusst, dass hed dr Text vo «Mit dym Sägä» ganz ä tiäfä Sinn hed, de s’heisst: «d’Fräid sie strahled uis, hei i jedes Huis». Und wemä der nechschti Värs nu derzue nimmt, wo’s heisst: «Fort mit Zank und Streyt, Friedä alli Zeyt», de isch dä Funkä Hoffnig derbiä, wo diä gettlich Macht uber diä Chriägsgebiät uisriährä chennt, dass das Eländ sey Ändi nimmt. Frag isch nur eb’s ächt wahr wird?