Die letzte Probe in diesem Jahr ist Geschichte

Am 13. Dezember des zu Ende gehenden Jahres sind wir bereits am halbi Achti (19.30 Uhr) zämägstandä und hend ganz fleyssig fir diä bevorstehendi Schwinger-Generalversammlig g’iäbt. Derzue sind nu es paar Liäder und Juiz usem Repertoire «abgstaibt» worde. De hed’s gheissä: Sind so gued und lehrid der Text vom «Sängertreu». Äs isch scho so, wemä der Text vo dem ghaltvollä Liäd, mid nachhaltigem Hindergrund nid uswändig cha, de teend’s de halt nid eso, we’s der Max Lienert schreybt: Es teend es Lied so hell und klar, e Juiz im Frindeschreis. Mä wird sich uber diä Fäschttäg bestimmt em Text widmä dass äs de a der Uiffiährig, z’klappä chund. Nachere guete Stund hemmer eys de der leyblichä Sterchig mid Mineralwasser, Jus, weyssem und rotem Räbäsaft, und speter ussem em Kaffee mit und ohni derfä hi-gäh. Nateyrlich hed’s ai eppis z’Ässä gä. Diä chalti Plattä und das feini Brot sind prächtigi Appetit-Areger gsi. Und wer nunig gnueg ubercho hed, fir dä oder diä hed’s nu Schoggelädli, Nissli und Manderindli gha.
Einisch meh hed sich’s der Dirigänt nid la näh und hed us der Wiähnachtsbeckerey Geiss ä feini Turte zum Dessert mitbrungä. Der Hans Setz hed seym ehemalige Bruefsstand alli Ehr gmacht und es kulinarisches Wunder anäzaibered wo uisgezeichnet gmundet hed. Dank seyg Diär ehräwärtä Hans fir diä schmackhafti Schlemmerey.