Rorate mit Jodelgesang, ein ergreifendes Erlebnis

Erneut durften wir am 7. Dezember den Morgengottesdienst musikalisch mitgestalten und an diesem besonderen Ereignis Anteil haben. Diese Stimmung bei Kerzenlicht und die Ruhe im Kircheninnern muss man erlebt haben.

Wer stahd scho gärä zmitzt dur d’Nacht uif und wer gahd scho gärä am Morged am Sächsi z’Chilä? Mä derfti wettä, wenn das ä Hampflä Leyt sind, de hed’s es de: Ja chasch dänkä. Mä uberwinded de inneri Schweinehund richted de Wecker uf diä Viärä und stahd de zur gegäbene Zeyt uif, dass mä rächtzeytig zum Isingä chund. Das Prozedere hed sich we s’letscht Jahr wiederholt und isch genai i’ghaltä wordä. Mä mues es eysnä Leyt wo usem Aargai, im Luzärner Hinderland, em Uirnerland und de Gmeinde vo Ob- und Nidwaldä heech arächnä, dass sie das Nidalltäglichi uf sich gnu hend. S’Chrischtchindli wird n’es bestimmt lohnä.

Lieder und Juiz sind sehr beliäbt
Wenn Heimatgsang am friächä Morgä himmelwärts teend und wenn’s de zerscht grad dr «Geburtstagsjuiz» isch, de isch’s es Dankgebät, dass mier nach gued durschlafner Nacht hend derfä uifstah. Nid sälbverständlich mues me scho gseh. «Im Buechewald» verweylä und diä herbschtlich Farbäpracht bestuinä, wird i dem Liäd wunderbar beschriebä und zeigt uif, dass mier das Wunderwärch vo der Natuir eysem Schepfer z’verdankä hend. Im «Heilig» isch das ai ganz uisgeprägt zur Gältig cho, wo’s i dr 3. Strophä heisst: Dank seyg Dier! Nu vorem Sanktus isch «Wiehnachtsgloggä» z’gherä gsi. Der Hilferuef: «Miädi Wält stach uif sing mit» miässti wältweyt gherd wärdä, will der Friedä bi gwissnä Leyt es Fremdwort isch. Mier leggid das Aliegä i Gotteshand und hoffid ganz fescht dass eysä Landesheiligi vom Ranft als Friedestifter nu einisch i diä Wält chund und dä ersehnti Friedä mitbringt. Midem «Lopperjuiz», «Mid deym Sägä« und «Schwyzerbode» isch dä «Friähmäss» so hed dä Chilägang friächer gheissä, z’Änd gangä.
Nacheme reychhaltigä Zmorgä im Chiläzenter hed mä sich a d’Arbet begäh, oder isch hei und …gogä weyterpfuisä.