Älplerchilbi Hergiswil, Sonntag / Montag, 16. / 17. Oktober 2022

I iisem Dorf derheimä sii, das isch fir das Jahr s’Motto gsi

Diä zwe Täg Chilbi sind verbey
scheener hend’s nid chennä sey
gniässä, fäschtä und ai feyrä
zämähockä nätti Wort verleyrä
alles das gherd zumnä Fäscht
derzue gasch ai nid friäh i s’Näscht
drum macht sich niämer gley uf d’Sockä
und wott hei lengsweys gogä hockä:.
drum gmerkid alli ziemlich gley
s’isch scheen i eysem Dorf derheimä sey:

Das Motto das isch unbestrittä und hed d’Fäschfräid ai zum Uisdruck bracht. Mä hed planged bis äs soweyt gsi isch und diä Älpler hend äs belzig’s, frehlich’s Fäscht vom Dorf fir s’Dorf uf d‘Bei gstellt. Scho am Sunntig Morgä vor Chiles, sell der 1. Chäsherr Renato Durrer mid seynere Monika scheyns per Bentley zum Hotäl Pilatus g’schoffiärd wordä sey, wo mä fein Zmorgä gässä heig, dass mä de eso richtig häig megä gfäschtä.
Under Muisigbegleitig sind’s de rächtzeytig i d’Chilä zogä, wo der Fäschtprediger Pater Dr.Dr. Hermann Josef Zoche dr Fäschtgottesdiänscht gfeyred und Predigt ghaltä hed. Dr 63-Jährig isch sehr wortgewandt uifträttä und hed seys Votum sehr zigig vorträid, mid Lacher gwirzt und verschiedeni Themä la i-fliässä. Uf der Orgele-Emporä hed mä’s leider nid so gued verstandä, drum chamä hiä keini Sequänzä läsä.
Idricklich sind ai d’Jodelliäder wo s’iheimischi «Echo vom Pilatus» gsungä hed erklungä, s’Alphornduo Sarnersee hed mid Prachtsvoträg uifgwarted und der Bättä-Riäfer Dani Blättler hed äbäfalls brilliärd.
Na Chiles hed’s Chilbikaffee und Chrapfä gäh, mä hed nu chley dorfned und hed sich de na-dis-na zum Zmittagässä zruggzogä. Ai d’Älpler hend nach der «Klassäfoti» im Adler Zmittag gässä und sind de uf diä Drey ufä Vorplatz bim Chiläzentrum «Hostatt» i-zogä. D’Jodler hed de der Uiftakt mid drey Vorträg gmacht, bevor s’Highlight d’Älplerspriich vo de Regina Durrer - Knobel und em Markus Leuthold vortreid wordä sind. Lässlichi Sindä wo zum guete Glick nid verborgä bliebä sind hend der Wäg a d’Effentlichketi gmacht und sind mid Lacher und Applais bedacht wordä. Dä prächtig Namitag isch de nach lengerem Zämähockä z’Änd gangä und hed de i wermere Zonä, sprich agschriebnä Heyser, sey Fortsetzig gfundä.
Am Mändigmorgä hed’s fir d’Älpler friäh us de Fädärä gheissä, will sie bi Zeytä im Roggerli Zmorgä gässä hend und de z’Chilä hend miässä. Dr Abt Christian hed d’Mäss gfeyred und sehr unterhaltsam zum Thema Heimat prediget. D’Kapällä Reto Blättler hed diä musikalischi Begleitig gliefered. Keis Wunder, dass «Abend am Vierwaldstättersee», «Schnupf isch Trumpf» und «Klänge vom Pilatus» nid gfähld hend. Na Chiles hed’s Chäs, Brot und Siässmoscht gä. Und de hend sich d’Älpler-Mannä zur Älplergmeind zruggzogä und d’Fraijä hend s’Unterhaltigsprogramm gnossä. Am Abig am halbi Sächsi isch Träffpunkt zum Älplertanz gsi, wo midem Apero igleyted wordä-n-isch. Der Loppersaal isch uisgezeichnet dekoriärd gsi, mä hed ä Zuesatzbihni uigstellt und stärnfermig tisched. Näbem Ässä hed’s nu verschiedeni Programmpinkt midem Trio St. Jakob, em Jodlerduett Stadelmann und d’Treychlergruppä z’gniässä gä, bevor d’Kapällä Reto Blättler midem Carlo Brunner verstercht zum Tanz ifgspielt hed.
Wenn dä fäschtfräidig Abig z’Änd gangä-n-isch, wissid nur diä wo speterussä hei sind go d’Aigä verteyflä.
Es lebe die Älplerchilbi 2024 und mier dänkid gärä a diä heyrdrig zrugg, will d’Wehmuet packt eys scho ä chley, de s’isch scheen i eysem Dorf derheimä sey!!