Am Bättag em Herrgott z’Ehrä und fir s'Chilävolch g'juized

Traditionsgemäss singt der Jodlerklub «Echo vom Pilatus» die obligate Jodlermesse zum Eidg. Dank- Buss- und Bettag. Dieses Jahr, am 19. September, kam uns die Ehre zu in der örtlichen Pfarrkirche unsere Stimmen erklingen zu lassen. «Ä sehr gueti Leischtig hemmer z’gherä ubercho», lauteten etliche Rückmeldungen von Chilägängern.

Mä hed’s de gued gmerkt, der Dirigänt hed gfordered, nid nur i dr Chilä, nei ai bim Isingä im Chiläzentrum. Das Morgäkaffee mid Gipfili hed miässä verdiänded wärdä. S’ganzi Chiläprogramm isch dett sehr konzentriärd durägsungä wordä und nach der Sterkig simmer de nach Zertifikatskontrollä dur d’Securitas, as Wärch uf d’Emporä und hend das Gotteslob mid «Herrgott mier stahnd vor dier» agfangä. Zum Zwischägsang hemmer «Dier Herr»  darbotä und zur Gabäbereitig isch «Schwyzerbode» erklungä.  Äs Lobliäd uf eysi Heimat wo dr Ernst Sommer midem Zitat: «Schwiizerlüüt im Paradies» i dr Schlusssequänz zum Uisdruck bringt, i was firmene scheenä Fläckli Ärdä mier derfid derheimä sey. Sehr idricklich ai der «Bätruefjuiz»  zum «Sanctus». Sehr markant isch’s derthär cho, das Solo durä Bruno Hodel, wo regurächt igfahrä isch. Der «Lopperjuiz» hemmer zur Kommunion  vortreid und «Mit dym Sägä» hed s’Schlussliäd vo dem Gottesdiänscht gheissä. Als Zuegab hemmer trotz strömendem Rägä «Ä gschänktä Tag» darbotä, was d’Chilägänger mid warmem Applais quittiärd hend.

Erwähnig verdiäned ai d’Wärtschetzig vo Beherdäseytä. Der Hergiswiler Gmeidrat hed sich’s nid la näh und sich vo denä Jodlerteen la berieslä, was mier Jodlerleyt sehr z’schetzä wissid. Es isch bimeid nid sälbstverständlich, dass mä uisgrächnet am Bättag friächer zu de Fädärä uisä gahd um sich folkloristischä Darbiätigä im sakralä Ruim hi-z’gäh. Härzlichä Dank derä Frai und denä Mannä fir eyches Cho, wo-n-eys sehr gfräid hed.
Ä Dank gahd ai a Chilärat Hergiswil, wo zum anschliässende Volksapero im Chiläzentrum igladä hed. Mier hend’s eys nid la näh dett «Im Buechewald» und der «Bärgler-Juiz» z’singä, nid z’letscht als Dankescheen, dass mier jedä Zeyschtig i dem Ruim eysi Prob derfid abhaltä. Merçi ai fir die Grosszigigkeit.