Diä letschti Prob vom Jahr 2021 am 14. Dezämber

Sie isch verbey und under Dach
Fazit dervo, ä gfräti Sach
Liäd und Juiz das hemmer gsungä
prächtig Teen sind ai verklungä
Neydlä und Chueche hemmer g’ässä
wend Nissli, Mandarindli nid vergässä
s’gid Kaffee Schnaps und weyssä Wey
Staatsschreyber hed’s grad derfä sey
a dem aa ja da gmerkt mä gley
diä letschti Prob, sie isch verbey.

Äs Jodlerjahr gahd langsam z’Änd
und wemmer s’guet druisuisä nänd
so hed mä gwiss zum Fräid ha Grund
wäg mänger scheenä gmiätlichä Schtund.

S’sind andri Schtundä ai derbiä
und machid eim usinnig Miäh
g’ändered hätt mä diä de useed gärä
warum muesch ai nid lang erklärä
diä Pandemie lahd das nid zue
und gid ai i dem Jahr nid Rueh
drum isch diä schwierig Lag und Zeyt
ä grossi Sorg fir alli Leyt.

Zwänzgzweijäzwänzg das chund scho gley
mä hofft es wärdi anders sey
nur weiss me nid we’s uisächund
warum, wieso, us welem Grund?
äs spielt kei Rollä, wiä, was, wo
äs wird scho richtig uisächo
es wird ai eister weyter gah
der Zeytälaif dä bleybt nid stah
äs ruckid bessri Zeytä-n-aa
doch wenn diä chemid weiss me nid
ganz sicher isch, dass äs diä gid
drum machid mier ä teifä Schnuif
mier hend Geduld und wartid druif.