s'Ob- und Nidwaldner Schwingerparlamänt hed taged

Nach neun Jahren waren es wieder soweit. Die Schwingersektion Hergiswil war Gastgeber dieser Tagung, die jedes Jahr von einer anderen Schwingergilde Ob- oder Nidwaldens organisiert wird. 220 Delegierte und Gäste interessierten sich für diese Belange.

Viel z’tue hend’s nid gha diä Hergiswiler Verantwortlichä. Will der Loppersaal bsetzt gsi isch, hed mä chennä Stansstader Gaschträcht i Aspruch näh und d’Mehrzwäckhallä nutzä. Gwirtet hed der Männerturnverein under der Regie vom Kari Graf wo mit seym Mitarbeiterstab vo 18 Personä fir s’leyblichi Wohl zueständig gsi isch. Mier hend derfä diä muisikalischi Begleitig «liefere».

Umfangreychi Traktandä
D’ Versammlig isch vom ONSV-Presidänt André Sigrist souverän gleitet wordä. Diä verschiedene Bricht sind gnähmiged worde. Vo Interässi isch i der Regu a denä Tagigä we d’Finanzä uisgsehnd. Ubere Duimä gseh, isch da ä scheenä Batzä uf der Seytä, eso dass der Jahresbeytrag bleybt we-n-är isch nämlich zäh Fränkli. Wahlä sind keini notwändig gsi, will keini Demissionä vorglägä sind. Mä hed diä Delegiertä a d’ISV-Versammlig in Schwyz nominiärd und bestummä, wer a d’Abgeordneteversammlig vom ESV uf Prattele gahd. De hed ai d’Ernennig vom Kampfgrichtspresidänt fir diä kantonalä Aläss statt gfundä und wer heyr am ISV-Fäscht z’Ibach darf kampfrichtere.

Fäschtort sind bestimmt
Will Nidwaldä nur drey und Obwaldä sächs Sektionä hed findet s’Kantonali allig zwei Mal d’obä und einisch dunnä statt. Giswil isch fir s’ONSV-Fäscht 2020 zueständig und Chärns machts im 21gi. De hed mä uber s’Kursprogramm debattiärd und s’Budget fir s’laifendi Verbandsjahr feschtgleid. Zwe altgediänti Vereinspresidäntä sind zu Ehrämitglieder ernennd wordä und diä zruggträttnä eidgenessischä Chranzschwinger Mäsi Matheys und Lutz Schäiber we ai de Thomas Hurschler und de Martin Zimmermaa sind mit Frichtächerb ideckt wordä.
Diä nechscht Tagig wird z’Sachslä uber d’Bihni gah.