Echo vom Pilatus

Hergiswil am See

  

 

A der Chapele-Chilbi uf Fräkmünt, Sunntig, 9. Septämber 2018

Wenn (Jodler)-Engel reisen lacht der Himmel und hit sind mier obsidruis go singä und hend derfä d'Chilächilbi (Gedenktag der Kapellweihe) mit eysem Gsang verscheenere. Me weiss, dass diä Chapälä dettä ä beliäbte Träffpunkt isch und erwartigsgmäss hed sich viel ja sogar sehr viel Chilävolch dett igfundä um diä Jodlerteen z'gniässä, der Pater Eugen wieder einisch z'gseh und...na Chiles der Apero z'gniässä.

S'isch diä zweit Jodlermäss wo miär dä Monet darbotä hend und d'Reaktionä sind dur s'Band positiv uisgfallä. Mä schetzt das gmeinsami Zämäsey i derä Chilä und diä Gmeinschaft läbt, nur scho drum isch dä Chilägang dett obä nid einä we-n-ä andere. Eysi Gsäng hend offni Ohre gfundä, de d'Chilägänger sind mee weder nur  andächtig i de Bänk gsässä und hend sich vo derä Muisig la berieslä, und em Pater Eugen seys Predigtwort isch ai nid u-gherd bliebä. Na Chiles hemmer uf dr Chilästägä nu Liäd und Juiz la erklingä, hend eys allmählich is Restaurant Fräkmüntegg zum Mittagässä zruggzogä, hend de ufem Vorplatz nu es Ständli gäh und sind de na-dis-na midem Bähnli nitzi gfahre um dä prächtig Sunnetag nu weyter z'gniässä.
S'isch ä Fräid gsi vor sevu Leytä derfä singä, wo-n-ai zur Ehr vo eysem hechschtä Herr himmelwärts verklungä sind.

2015 Webmaster Echo vom Pilatus