Echo vom Pilatus

Hergiswil am See

  

 

Ai heyr am Eidg. Dank- Buess- und Bättag z'Stansstad uf Bsuech, Sunntig, 16. Septämber 2018

Äs hed sich i-birgered, dass d’Hergiswiler Jodler ai das Jahr am Bättag, Stansstader Chilärächt hend derfä i Aspruch näh und d’Jodlermäss singä. «Äs hed de ganz scheen teend», hend de grad ä huifä Chilägänger gseid. Mier hend das gärn gmacht, obwohl’s der dritti Sunntig gsi isch, wo mier underwägs gsi sind.

Am Viertel ab Neyni isch Besammlig im Ruim fir Fraijä ud Mannäberatig gsi, wo mier zerscht igsungä und derna Gipfelkonferänz abghaltä hend, bevor am halbi Elfi diä Mäss agfangä hed. Dr Pfarrer Daniel Bühlmann und dr Diakon Arthur Salcher sind dem liturgische Teil vorgstande und mier hend der gsanglichi Teil beytreid.
I seym Predigtwort isch der Pfarrer uf dä bsunderi Tag i-gangä und hed gmeind, dass mier allä Grund heigid dankbar z’sey, äs bitzili Buess tue nid schlächt wär und s’bättä nid uf d’Zeytä schiäbä settid. Eys seyg Friedä und Wohlstand beschiedä was ja nid sälbstverständlich seyg. Är isch de ai ufe Brueder Chlais z’rede cho wo anä 1481 d’Eidgenosse zu Zämähalt, Einigkeit und Vernunft aghaltä und sie uifgfordered hed, Freyburg und Solothurn i Bund uif z’näh. (Wer aber underwägs gsi isch hed de im Verlaif vo dem Sunntig gmerkt, dass vo dankä, biässä und bättä härzlcih wenig umä gsi isch, de vom Vieri am Namittag ewäg sind’s uf de Aitobahn Richtig Luzärn doppelspüurig gstande, das nur näbäbey gseid.)
Nachere guete Stund simmer de uf dr Chilästägä nu einsich zämägstande und hend eys vom Chilävolch mideme Natuirjuiz verabschieded. 
(Und da wär de nu d’Nationalhymne: Diä zwe Strophe sind de tadellos derthär cho. Und s’Liäd Nr. 80: Lasst uns Gott dem Herrn lobsingen, hed de ai keini Problem gmacht. Es klars Zeichä, dass sich d’Jodler mid Liedere usem KGB bestens uiskennid und wenns’ sey mues ai ganz gärä singid. Derfir es grosses Bravo!!

2015 Webmaster Echo vom Pilatus