Echo vom Pilatus

Hergiswil am See

  

 

104. Delegiertenversammlung vom «Eidgenoss» in Fribourg, Samstag, 10. März 2018

Fazit vo derä Tagig. D'Karin Niederbärger isch mit Standing Ovation als Zentralpresidäntin EJV fir 3 Jahr wiedergwählt worde. Ai d'Redaktorin Sandra Ledermann beliäbt i ihrem Amt. D'Finanze sind im Plus und d'Statuitäänderig isch problemlos uber d'Bihni gange. We's mid der Jodlerzeytig weytergahd, isch sehr ugwiss. Dr Edi Gasser us Giswil isch midem Stuker Legat uiszeichnet worde. Verschiedeni Persone sind zu Ehrä- und Freymitglieder ernannt worde, under anderne d'Bernadette Kaufmann-Durrer. Und diä nechscht Delegiärteversammlig findet am 9. März 2019 in Äschlismatt statt und fahd am halbi Elfi aa. 

S'isch ä miähsami Reis gsi i d'Weschtschweyz und gleych hed d'Hergiswiler Delegation nach guet zweistindiger Fahrt uber Bärn und im Stai fahrä, Fribourg erreicht. D'Versammlig vo vo 360 Persone, dervo 240 Delegiärte bsuecht worde-n-isch, hed grad zerscht ä Neyjerig i Form vo der Simultanubersetzig erfahre. Diä verschiedene Jahresbricht sind gnähmiged worde. Der Eidgenessisch Jodlerverband  bestahd zur Zeyt us 806 Vereine, das sind 4 weniger weder 2017. Mitgliedermässig isch är vo 17900 Leyt um 50 Personä chleyner worde.

Jodlerfäscht Brig isch ä Bombä gsi
Gärä dänkt mä a das Riesäfäscht am Rotten zrugg wo sehr gued und friedlich uber d'Bihni gange-n-isch. Der OK-Co-Presidänt Roberto Schmidt hed de nu einisch im Wallischer Dytsch seyni Regischter zogä und ganz positiv uf dä u-hüere Chrampf zrugg-glüegt. Vo dem Super-Erfolg cha-n-ai der Jodlerverband finanziell profitiärä, hed ihm doch das Fäscht ä Betrag i sächsstelliger Heechi i d'Kassä gspielt, sodass schwarzi Zahlä uisä gluegt hend. D'Suisa hed 100 '000 Stutz ubercho und s'Budget fir 2018 isch uisglichä. Basel 2020 wird mit Klassiärig duregfiährd. Nach derä Zahläbeygetä und Abstimmig hed's ä churzi Paisä gäh und de isch mä midem Zabigplättli uifgfahrä.

Statuitä-Änderig
S'Regulativ isch neyzeytlich aapasst worde, was sevu heisst, dass der Verband inere Schlankheitskuir underzogä wordä-n-isch. Verschiedeni Kommissione sind verchleynered worde, bishärigi Mandatsträger sind verabschiedet worde und Neywi hed mä in Amt und Würde gnu, so der Ännetbirger Muisgschuelleiter Emil Wallimann. Är stahd als Fachkommissionspresidänt i der Sparte Jodlä vor und hed s'ganzi Kurswäse under sich.

Ehrigä
Em Gasser Edi isch s'Stuker Legat verliähä worde sehr zu seynere Uberraschig. Diä Ehrig hed dä sympathischi Maa vo Giswil mee als nur verdiäned, hed är doch als Juror, Uisbildner und Referänt, aber als Dirigänt vom Jodlerklub Giswil, Chorleiter vo der UJV  und und sehr viel fir d'Jodlerbewegig gleischted. Der Büeler Toni usem Muotathal hed ä sher gued verfassti Laudatio  sehr zu Ed's Fräid vorträid. D'Giswiler Jodler hend sich's nid la näh und sind zu Edi's Ehr äxtra uf Fribourg gfahrä um dä feyrlichi Momänt mideme Gratulationsständli z'undermalä. Im weytere Verlaif vo dem Traktandum hed mä Personä zu Frey- und Ehrämitglieder ernannt.

Am halbi Sächsi isch me zum Apero ubergangä und am zäh ab Siebni hed's Znacht gäh. De simme nu chley zämägheckled und hed eys de bi Zeytä ufä Häiwäg gmacht.
 

 

 

2015 Webmaster Echo vom Pilatus