Echo vom Pilatus

Hergiswil am See

  

 

Älplerchilbi Hergiswil am 16. Weymonet 2016 nachem Motto: Hergiswil - hiä verwurzled

Alli zwei Jahr feyrid's im Lopperdorf das traditionelli Fäscht und so isch ai heyr a dem zweitä Oktobersunntig alles uf de Beinä gsi wo stah und laifä hed chennä um das Fäscht vo der Zämägherigkeit z'feyrä.

Wättermässig hend's es preicht, obwohl schlegudickä Näbu am Morge glägä-n-isch, wo der Fäschtfräid aber neyd hed chennä a-tue. Under de Kläng vom Muisigverein isch diä hibsch Älplerschar i d'Chilä zogä, wo der Fäschtgottesdiänscht vom Pater Thomas Blättler vom Chloschter Ängubärg zelebriärt wordä-n-isch. Eys Jodler isch einisch meh d'Ehr zuegfallä dä besinnlich Momänt mid Jodelliäd und Juiz z'umrahmä. S'heig scheen teend hed's na Chiles gheissä, was Balsam fir d'Jodlerseel isch, will's bim I-singä nid äso rund gluffä-n-isch. Aber mier sind bestrebt gsi eyses Beschti z'gäh und ubere Duimä   darf mä mee als nur z'friedä sey.

Fräid und Dankbarkeit
Midere guete Älplerchilbipredig hed dr Ängubärgerpater uifgwartet und zu denä erwähnte Thema gredt. Nachdem är s'Chilävolch in globo am Afang begriässt hed und s'Motto erwähnt hed, isch är i seynä weytere Votä nid nu neecher uf's verwurzled sey i-gangä, hed aber klar z'verstah gäh, dass d'Wurzlä der Afang vo allem Wärde und Sey sind diä mid Fräid und Dankbarkeit verbundä sind. Ganz träffend hed är s'Gedicht «Älplerchilbi» vo der Ida Knobel vortreid und dermit das tradtionsfäscht de Chilägänger neecher bracht. Nachere guete Stund hed me sich bi Kaffee Avec und Chilbichrapfä ufem Chiläplatz vertwellt und dä musikalische und instrumentalä Darbiätä gnossä.und dä Faxä vo de Butzi zuegluegt.

Älplerspriich 
Nachem Fäschzug abem Glasirestauant Adler hed me sich de bim Chiläzentrum igfundä, wo diä verfasstä Spriich vom Manuel König und de Daniela Blättler - Kaiser vorträid wordä sind. Vo der Halbschuehpreysverleihig, ubere verpassti Arzttermin und em verfriähtä Chuchiabbruch, oder em vermisstä Handy wo im Chiählschrank wieder zum Vorscheyn cho isch, hed's bsunders äis Gschichtli derbiä gha, wo der Gmeindrat uf d'Schippä gnu und ganz spontanä Applais  uisgleest hed.

Älplertanz
Mid der Ländlermäss Paxmontana, vortreid vom Chilächor und der Kapälle Reto Blättler, hed der Mändig sey Afang gnu. Der Ängelbärger Abt Christian hed dä Gottesdiänscht zelebriärt. Seyner Beruefig als Seelsorger isch är mee als nur grächt worde, denn sey Predig hed är dunnä im Chiläschiff vor de Älplere ghalte. Und är hed sich de nid gschochä Fragä z'stellä vo was dass i dr Läsig und im Evangelium d'Reed gsi seyg. D'Älpler und s'Chilvolch hed so gued uifpasst, dass d'Frage im Chiläruim stah bliebä sind. Keis Wunder also, dass der Abt d'Erklärig sälber hed miässä abgäh. Nachere Stund isch de diä Mäss mid Klänge vom Pilatus uisklungä. Dussä hend d'Butzi scho gwarted und der Apero mid Chäs, Brot und Moscht hed Abnähmer gfunde. S'Abigprogramm hed de am halbi säschsi midem Apero agfangä und churz druif appä isch de s'Bankett gserviärt worde. De Kabarettischt Veri hed de fir Underhaltig und etlichi Lacher gsorgt und d'Gupfbuebe hend de zum Tanz uifgspielt. Scheyns seygs bim eintä und andere chley (massiv) speter wordä bis me hei seyg der langewäg go hockä. Und s'gäb bimeid scho derä diä blangi uf diä Schtund bis diä nechschti Hergiswiler Älplerchilbi chund.

 

2015 Webmaster Echo vom Pilatus