95. Generalversammlung vom 16. Jänner 2016 isch under Dach
Stefan Thalmann und Willy Rohner werden zu Aktiv-Ehrenmitgliedern ernannt. Peter Würsch im 1. Tenor und Milo Mathis im 2. Bass verstärken unser Gefüge. Thomas Häfeli tritt kürzer, lässt aber wissen, dass er zu einem späteren Zeitpunkt wieder einsteigen möchte.
S'hed keini wältbewegende Traktandä z'behandlä gäh und wenn's derä gha hätt, de hätt me's vorhär im ängere Chreis beredt. Midem Lopper-Juiz isch diä Tagig ereffnet worde und diä 13 Gschäft umfassendi Tagesornig isch de aschliässend abgarbeitet worde. Will dr Willy Rohner sehr vorteilhaft gsässä-n-isch hed är als Stimmäzehler derfä amtä.
Präsidialer Rückblick
Obwohl mier s'letscht Jahr ufenes Jahreskonzärt verzichtet hend, isch's ganz erstuindlich, dass mier trotzdem nu rächt fleyssig underwägs gsi sind und da und dett mit Liäd und Juiz, Fräid und Abwächslig brungä hend. Der Vorsitzendi Martin Blättler hed de diä Uiftritt nu einisch beleychted und isch under anderem ai uf's Jodlerfäscht z'Sarnä z'redä cho. Trotz optimaler Vorbereitig hed's de nid ganz firnes Eis glänged. Mier hend diä Klass Zwei zur Kenntnis gnu und chenid läbä dermit. Dass mier der Muet uifbracht hend a dem Fäscht aktiv teil z'näh isch stercher z'gwichtä weder Punktzahl und Jurybricht. Fyyre bi de Tschifeler isch ä Supersach gsi und bleybt eys i sehr gueter Erinnerig.
Gueti Uiftritt hemmer ai am Nichtkranzer Schwingfäscht, am Muettertag, a Fronleychnam, bim ökumenischä Gottesdieänscht, rundä Geburtstäg und der Schwingergeneralversammlig gha. Uisägstochä hed eysi Presänz a der Wahlfeyr vo eysem Ehrämitglied und neywä Ständerat Hans Wicki jun. und vor allem a der Älplerchilbi z'Dalläweyl. S'isch ganz ä gfräiti Sach gsi und hed sehr sehr guet tah.
Diä truirig Tatsach, dass mier nur Gascht uf Ärdä sind, hend mier im letschtä Jahr grad vier Mal erfahrä miässä. So hed dr Alois Würsch nach lengerem Leydä sey irdisch Pilgerschaft beändet. Ai dr ehemaligi 2. Tenor-Sänger Sepp Wächsler isch nach schwärer Chranket, erscht 57-jährig i diä ewigi Heimat abberuefä wordä. Midem Ehrämitglied «Bliämili-Walti» hed s'Echo vom Pilatus sey Hofgärtner und en uberuis liäbenswürdigä Wägbegleiter verlorä. S'Totägleggli hed am 9. Septämber s'Stärbä vo eysem Ehräpresidänt und Ehrämitglied Hans Wicki - von Wyl verchindt, wo churz nach seym 80. Geburstag fir immer vo-n-is gangä-n-is. Mier wend ihnä äs ehrend's Adänkä bewahrä, dankid ihnä fir ihres Wirkä i eysem Chor und bleybid mid ihnä uber s'Grab uisä verbundä, ganz im Sinn vo «Kamerade wemmer sey. Dr Herrgott schänk ihnä der ewig Friedä!
Roti Zahlä
Da mier keis Jahreskonzärt, wo eysi Haiptinahmequälle isch gha hend, hed dr Kassier vomene Schwund im Kässili bekannt gäh miässä. Es gahd eys aber trotz Uifhebig vom Mindestkurs nunig schlächt, heisst aber nid, dass mer's Gäld mid vollne Händ zum Feischter uis riährä derfid.
S'Wahlgschäft hed keini hechä Wälle gschlage, denn der Presidänt Martin Blättler, der Kassier Sepp von Rotz und der Aktuar Johannes Blöchliger bleybid eysweyteri zwei Jahr erhaltä, genai so we alli andere Chargiertä wo fir eis Jahr gwehlt wordä sind.
Fräidätag fir Jubilarä
Sitt 15 Jahr stahd dr Blättler Urs i eysnä Reihä und isch ä sichere Wärt als 2. Jodler/1. Tenor und als versiärtä Solischt bim Bätruef-Juiz. Scho 20 Jahr prägid der Stefan Thalmann und der Willy Rohner s'Erscheynigsbild vom Echo vom Pilatus. Sie sind verdiäntermasse mit der Ehrämitgliedschaft bedacht wordä. Scho 25 Jahr singt der Thomas Häfeli bi eys mit. Är, der Neyveteran wird chirzer trättä, schliässt aber ä spetere Wiederistieg nid uis. S'Emmy Agner und s'Miggi Niederbärger, eysi zwe einstigä Vorjodlerinne wo-n-eys 46 resp. 41 Jahr diäned hend, wärdid a der DV vom Unterverband in Nottwil fir 50 Jahr zu Ehräveteraninne erkorä.
Schüpfheim (k)ein Thema?
Ob mier a s'Jodlerfäscht vom 24. - 26. Juni gah wärdid, stahd nunig fescht. Sicher isch aber, dass mier im neywä Vereinsjahr am 19. März 2016 eyses Jahreskonzärt hend und weyteri Uiftritt bestreytä wärdid. Schliässlich sind de ai nu Reisefräidä aagseid, wo mier en Abstächer uf Prada im Puschlav machä wärdid. Schliässlich wemmer i der Mitgliederwärbig Rächnig trägä, de i das Duirthema sell Bewegig cho, damit s'Echo vom Pilatus weyterhin widerhallt und nid langsam verstummt.