Zum Hinschied unseres Ehrenmitgliedes und Hofgärtners «Blüemeli-Walti», Stansstad
Fräid und Läid sind ganz nooch binänand heisst's bekanntlich und leyd in der Sach vo der Natuir, dass es stimmt. Hit am 24. Juli hend mier und mid eys ä grossi Truirgmeind was stärblich am Bliämili-Walti gsi isch ufem Stansstader Friedhof Abschied gnu vomene grosse Chrampfer, fürsorgliche Familievatter und stolzä Grossdädi, Gschäftsmaa und liebä Frind.
Nacheme glanzvolle Jodlerfäscht und scheenem Abschlussabig am 29. Juni 2015 wo der Blüemeler nu mid eys zämägsässä-n-isch, hätt gar niämer dänkt, dass ihn's eysä Schepfergott 17 Tag speter zu sich holä wird. Das Unabänderlichi hed's gultä zur Kenntnis z'nä.
Eysä Bliämi isch am 30. Aigschte 1940 z'Alpnach uf d'Wält cho. Speter hed de d'Familie Blättler uf Stansstad zigled und dr Walti isch de dett und z'Stans i d'Schuel. Im Oeschbärg hed är de sey Gärtner-Lehr gmacht und nach Zuesatzuisbildigä s'Rischtzeyg fir d'Ubernahm vom elterliche Betrieb aageignet. 1970 isch är mid seynere Frai Marlies zämä Gschäftsinahber vo dem mittlerweyle weyt umä bekannte Bluemelade «Blüemeli-Walti» worde.
S'isch eigentlich erstuindlich, dass ä Maa we der Blüemeli-Walti näb seym strängä Tagwärch nu Zeyt gfunde hed imene Hobby nachä z'gah, wo vo seynere spärliche Freyzeyt ai eppis abverlangt hed. 1967 isch är nämlich Jodler worde und hed bim «Echo vom Pilatus» z'Hergiswil als 1. Bass mitgsunge. Im Verlaif vo seynere mehrjährige Mitgliedschaft hed är Vorstandsarbet verrichtet und isch uber all diä Jahr en versiärtä Dekorationsprofi a de jeweyligä Jahreskonzärt gsi. Ai nach seym Rücktritt hed's bi-n-ere Afrag gheissä: d'Dekoration....das gahd de i d'Ornig.
Dr «Blüemeli-Walti» isch ä gselligi Person gsi. Näb goldigem Humor hed är ä Vorliäbi fir s'Fischä gha und vor allem sehr gärn ä zimpftigä Jass g'klopfed. Da hed är sich da allig scho nu cheenä ereyfere und wenn's druif aacho isch, de Gägner luit und deytlich der Tarif durä gä, obwohl das neyd gnitzt hed, will är meischtens dä gsi isch wo hed miässä zahlä. S'hed ihm neyd uisgmacht, d'Haiptsach isch gsi, dass är dr Plaisch dra gha hed. Und lachä hed är chennä...da hed's eim sälber allig schiär verbutzt. Und genai das härzhafti Lachä, dä leytseelig Blick, dr schneeweyssi Schnuiz und nu viel meh...das wird eys fählä.
Liäbä «Bliämili-Walti». Mier Jodler dänkid gärä a Dich zrugg und sind Dier uber 's Grab uisä dankbar fir alles was Dui fir d'Hergiswiler Jodler gleischted hesch. Bim himmlische Vatter wo Dich hei griäft hed wirsch Dui jetzä als «Bliämili-Walti» d'Gärtä pflegä. Häb Dank fir alles. Mier gennid Dier der ewig Friedä.