Echo vom Pilatus

Hergiswil am See

  

 

70 Jahre Schwegler Bärti

Mä glaibt das chuim und doch isch's wahr
der Schwegler Bärti gid äs 70 Jahr
zur Ehr vo dem sehr rischtigä Maa
stimmt me gärä happy
brithday aa.

Wer bi s'Schwegler scho einisch zum fäschtä glade gsi isch weiss, dass de dett gar neyd fähld. So isch's ai a dem Geburstag gsi. D'Huisherrin Vreni, s'Bärti's Frai, hed ai fir dä Geburtstag sämtlichi Fädä zogä und d'Stubä vo derä  4 1/2 Zimmerwohnig churz spitz inä bäimigi Fäschtwirtschaft umfunktioniärd.

Bärti, die Popularität
Obwohl's scho feyf Jahr häär sind, dass dr Bärti sey Tschop als Schuelhuisabwart z'Stansstad quittiärd hed und drmit ewäg vom Fäischter isch, macht är sich ai nach seyner Pensioniärig da und dettä nitzlich.  Är isch en uisgezeichnete Grossvatter mid Gaimerqualitetä, fahrd wenä Routinier  mid seym Teff im Stanser Dorf umä und luegt sitt Churzem (s'cha-n-ai lenger sey) als Sakristan(Sigrist) i dr Kapuzeynerchilä zum Rächtä. Ai diä sportlichi Betätigung isch ihm nid fremd, denn ab und zue isch är midem Vreni zämä ufmene lengere oder chirzere Marsch az'träffä. Und will diä Freyzeytbeschäftigung usinnig asträngend isch, gand sie sich sehr gärn i wermere Zonä go erholä.

Bärti, der Jodler
Är isch ä gueti und ä treyi Seel eysä Bärti, denn är stahd scho sitt 28 Jahr i eysnä Reihjä und  singt im zweitä Bass. Är macht kei Wäsig um sey Person, mä cha-n-ihm riäfä wemä-n-ihn's bruicht und de chund är. Ai bi allfelligä Uifgabe womä-n-ihm ubertreid isch uf ihn's Verlass. Är isch wirklich einä, genai eso wemänä gärä hed.

Bärti, der Jubilar
Und geschter am 19. Oktober 2015 isch är jetz genai siebetzgi wordä. D'Hergiswiler Jodlerschar hed d'Prob friächer agsetzt und isch uf Iladig vom Bärti nachhär bi ihm derheimä go zuechesitzä. We scho erwähnt hed niämer miässä im Trochene hockä und Hunger ha. Zu feinä Grillade hed's Härdepfu mid Suirrahmsosse und passendi Saläter gä. Nateyrlich hend es reychlichs Chuechebüffet sowenig we Guetzliund Kaffee avec gfählt. Es Fäschtmahl fir alli Gratulante wo das Zämäsey bi's Schwegler's zum Lengerbleybä gnutzed hend, will's äbä gmiätlich gsi isch und dur Jodlerkläng uifglockered wordä-n-isch.
LIäbä Bärti mid Vreni, Daniel und Urs. Gärä  nähmid mier d'Glägäheit wahr und
dankid ganz uifrichtig fir diä grosszigig Iladig und Vercheschtigung. Bärti, mier weyschid weyterhin alles Gueti, bleyb gsund und heb Sorg.

Als chleyni Hommage a Dey Adrässi, liäbä Jubilar, s'nachstehendi Liädli wo nach der Melodie «Em Sepp sey Chatz» cha gsunge wärdä:
Der Schwegler Bärti isch, ä flottä jungä Maa
im Stanser Dorf da triffsch,  der Bärti eppä-n-aa
mä glaibt's fascht nid und doch isch's jetzä wahr
dä Bärti ja dä hed nu fascht ä keini graijä Haar.
Doch..  wenn gnewer härä luegsch, de gsehsch de eifach gley
diä Haartracht diä tued, scho ziemlich weyssi sey
jetz gmerkisch sofort, eso isch's Läbä halt
me isch nur einisch Zwänzgi und wird de langsam alt.

I eysem Schwegler Bärti, dem flottä jungä Maa
i dem gsehsch siebetzg Jährli, nu uberhaipt nid aa
är isch so richtig buschper, ä zwägä Burscht und gsund
är gniässt seys Räntnerläbä und nimmt's eso we's chund.
Ja.. mier alli weyschid s'Beschti bleyb weyter starch und froh
Dui eysä Schwegler Bärti, mach numä weyter so
jetz land's mier la erteenä und zwar ganz weyt und nooch
Dui eysä Schwegler Bärti är läbi drey Mal hoch!!! 

 

 


  

 

2015 Webmaster Echo vom Pilatus